Fe fyddai mwy o fudd wrth gael gorsaf niwclear mwy o faint ar safle'r Wylfa meddai Llysgennad Unol Daleithiau America i’r DU sy’n dweud ei fod yn “hynod siomedig” gyda phenderfyniad y llywodraeth.

Cyhoeddwyd ddydd Iau y bydd tri adweithydd niwclear modiwlaidd bach (SMR) cyntaf y DU yn cael eu gosod ar safle Wylfa, wedi eu dylunio gan gwmni Prydeinig Rolls-Royce SMR. 

Mae adweithyddion modiwlaidd bach yn orsafoedd pŵer niwclear llai, wedi’u cynllunio i’w gosod ar y safle fel modiwlau parod.

Y gobaith yw y bydd y dechnoleg yn gyflymach i'w hadeiladu na gorsafoedd mwy fel Hinkley Point C.

Ond dywedodd llysgennad UDA i’r Deyrnas Unedig, Warren Stephens (uchod), ei fod wedi gobeithio am ddyfodol gwahanol i safle Wylfa ar Ynys Môn.

Daw ei sylwadau wedi adroddiadau bod cwmni o’r Unol Daleithiau, Westinghouse, wedi cyflwyno cynlluniau i Lywodraeth y DU i adeiladu gorsaf mwy o faint ar y safle.

“Nid yw ein siom gyda phenderfyniad llywodraeth y DU i adeiladu tri adweithydd modiwlaidd bach yn Wylfa yn ymwneud â chwmni o'r Unol Daleithiau yn cystadlu yn erbyn cwmni o'r DU,” meddai.

“Byddai dynodi safle Wylfa ar gyfer prosiect niwclear ar raddfa gigawat - neu ganiatáu datblygiad ar raddfa gigawat a modiwl bach yn Wylfa - yn creu'r budd mwyaf a chyflymaf i ddefnyddwyr ynni'r DU ac economi'r DU. 

“Fel Llysgennad yr Unol Daleithiau, byddaf bob amser yn eiriol dros fusnesau'r Unol Daleithiau. 

“Ond rwyf hefyd eisiau'r hyn sydd orau i bobl Prydain - ar raddfa gigawat a modiwlaidd bach yn Wylfa.”

‘Ddim yn ymddiheuro’

Dywedodd yr Ysgrifennydd Ynni Ed Miliband yn gynharach nad oedd yn ymddiheuro am ddewis Rolls-Royce ar ôl y feirniadaeth gan lysgennad yr Unol Daleithiau.

"Mae'n wir nad yw'n meddwl ei fod yn wych," meddai.

"Y rheswm nad yw'n meddwl ei fod mor wych yw oherwydd ei fod eisiau i gwmni o'r Unol Daleithiau fod ar y safle.

"Oherwydd ei fod yn meddwl mai dyma'r safle gorau ... Rwy'n deall hynny'n llwyr, mae'n gwbl iawn iddo fod yn cyflwyno'r achos dros gwmni o'r Unol Daleithiau.

"Fe wnaethon ni ddewis cwmni o Brydain, Rolls-Royce, ar gyfer y safle hwn, ac nid wyf yn ymddiheuro am hynny.

"Ein gwaith ni yw sefyll dros y budd cenedlaethol.

"Mae yna lawer o bethau rydyn ni'n cydweithio â'r Unol Daleithiau arnyn nhw."

Dywedodd y gallai'r safle arall a ystyriwyd, Oldbury yn Swydd Gaerloyw, "leoli amryw o gwmnïau eraill o'r Unol Daleithiau sydd â diddordeb mewn adeiladu gorsafoedd niwclear newydd yn y wlad hon".