Mae cwest wedi clywed fod dynes o Brestatyn a gafodd ei lladd yn honedig gan ei mab wedi marw o ganlyniad i anaf i'w phen.

Fe gafodd corff Angela Shellis, 45 oed, ei ddarganfod ar lwybr ger gwarchodfa natur Morfa yn y dref ar 24 Hydref.

Fe gafodd ei mab, Tristan Thomas Roberts, 18 oed, ei arestio ar yr un diwrnod a'i gyhuddo o'i llofruddio. 

Fe wnaeth ymddangos yn Llys y Goron Yr Wyddgrug ac mae'n parhau yn y ddalfa, gydag achos llys wedi ei osod ar gyfer mis Mawrth 2026. 

Ni wnaeth Roberts, a oedd yn byw gyda'i fam ym Mhrestatyn, gyflwyno ple.

Fe gafodd adroddiad seiciatrig ei orchymyn i benderfynu os y bydd yn gallu cyflwyno ple. 

Fe gafodd Ms Shellis ei geni yn Nhywyn, ac roedd yn gynorthwyydd addysgu yn Ysgol Uwchradd y Rhyl.

Mewn gwrandawiad byr yn Rhuthun ddydd Llun, dywedodd Uwch Grwner Dwyrain a Chanol Gogledd Cymru, John Gittins, mai trawma i'r pen oedd achos ei marwolaeth, yn ôl canfyddiadau cychwynnol patholegydd y Swyddfa Gartref, Dr Brian Rodgers.

Fe gafodd y cwest ei ohirio.