Mae dyn 64 oed wedi marw ar ôl gwrthdrawiad ar ffordd osgoi Caernarfon yng Ngwynedd.

Cafodd yr heddlu eu galw i ffordd yr A487 yn dilyn adroddiad am wrthdrawiad rhwng fan a cherddwr ger Bontnewydd tua 20.30 nos Sul.

Er gwaethaf ymdrechion y gwasanaethau brys, bu farw'r cerddwr yn y fan a'r lle. 

Mae perthynas agosaf y dyn, a'r crwner, wedi cael gwybod.

Dywedodd y Rhingyll Katie Davies o'r Uned Plismona Ffyrdd: "Rwy'n rhannu fy nghydymdeimlad dwysaf â theulu'r dyn ar yr amser anodd hwn.

"Rwy'n apelio ar unrhyw un a welodd y gwrthdrawiad, neu sydd â lluniau camera dangosfwrdd, i gysylltu gyda'r heddlu.

"Rwyf hefyd yn apelio ar unrhyw un a oedd yn teithio ar hyd yr A487 cyn 20.30 neithiwr a welodd ddyn yn cerdded ar hyd y ffordd osgoi i gysylltu â ni."

Dylai unrhyw un sydd â gwybodaeth gysylltu gyda'r heddlu gan ddyfynnu'r cyfeirnod C174462.