Mae'r Brenin Charles wedi cymryd teitl 'tywysog' ac arddull 'Ei Uchelder Brenhinol' ei frawd, Andrew Mountbatten Windsor, oddi arno'n ffurfiol. 

Daw wrth i aelodau o Gyngres yr Unol Daleithiau ysgrifennu at y cyn dywysog yn gofyn am gyfweliad ag ef mewn cysylltiad â’i “gyfeillgarwch hirhoedlog” gyda’r pedoffeil Jeffrey Epstein.

Cafodd newidiadau y Brenin eu cyhoeddi drwy'r Llythyrau Patent ddydd Iau gan Swyddfa'r Goron yn The Gazette, sef cofnod cyhoeddus swyddogol y DU.

Dywedodd y cofnod: "Mae’r Brenin wedi bod yn falch, trwy Lythyrau Patent o dan Sêl Fawr y Deyrnas, wedi'i ddyddio ar 3 Tachwedd 2025, o ddatgan na fydd gan Andrew Mountbatten Windsor yr hawl mwyach i ddal a mwynhau arddull a theitl yr 'Uchelder Brenhinol' nag urddas y teitl ‘Tywysog’."

Daeth penderfyniad y Brenin Charles i ddileu Andrew o'r frenhiniaeth a chymryd ei hawl geni i fod yn dywysog, yn ogystal â'i ddugiaeth, yn dilyn ei gysylltiadau â'r pedoffeil Jeffrey Epstein.

Fe gafodd hunangofiant gan y diweddar Virginia Giuffre, a wnaeth honni iddi gael ei cham-drin yn rhywiol gan Mr Mountbatten Windsor pan oedd yn 17 oed, ei gyhoeddi ym mis Hydref. Bu farw Ms Giuffre yn Awstralia ym mis Ebrill o ganlyniad i hunanladdiad. 

Roedd hi wedi honni yn ei hunangofiant, sydd wedi ei gyhoeddi ers ei marwolaeth, ei fod wedi cael rhyw gyda hi ar dri achlysur pan yr oedd hi yn ei harddegau.

Mae Mr Mountbatten Windsor wedi gwadu’r holl honiadau yn ei erbyn.

Fe wnaeth cofnod arall gadarnhau ddydd Iau fod Andrew wedi’i ddileu o’r Rhestr Bendefigaethau fel Dug Efrog.

Dywedodd y cofnod: "Mae’r Brenin wedi bod yn falch, trwy Warant o dan ei Lawlyfr Arwyddion Brenhinol ar 30 Hydref 2025, i gyfarwyddo Ei Ysgrifennydd Gwladol i ddileu Dug Efrog o’r Rhestr Bendefigaethau ar unwaith."