Mae cwest wedi clywed bod pâr priod a'u ci wedi cael eu darganfod yn farw gan eu merch yn eu cartref yng Nghaerdydd yn dilyn llofruddiaeth ac yna hunanladdiad.

Fe wnaeth Stephen Jefferies, 74 oed, saethu ei wraig Christine, 72, a'u ci, May, yng nghartref y teulu yn ardal Trowbridge o'r brifddinas ar 5 Hydref y llynedd.

Cafodd y cwpl eu darganfod yn farw gan eu merch, Martine Stecker, a gafodd ei galw i'r tŷ yn dilyn pryderon gan gymydog.

Ar ôl i Ms Stecker gyrraedd y cartref yng Nghilgant Morfa, fe ddaeth o hyd i gyrff ei rhieni yn yr ystafell wely. 

Daeth cwest yn Llys y Crwner ym Mhontypridd i'r casgliad bod Mr Jefferies wedi lladd ei wraig a'i gi, cyn troi'r gwn at ei hun.

Clywodd y cwest ddydd Iau fod gan Mr Jefferies hanes o iselder a bod y cwpl mewn dyled o £35,000 ar adeg y digwyddiad.

"Doedd gen i ddim syniad bod ganddyn nhw broblemau ariannol o gwbl," meddai Ms Stecker.

"Rwy'n credu bod [fy nhad] wedi bod â'r byd ar ei ysgwyddau ond ni ddangosodd hyn erioed.

"Dydw i ddim yn credu bod fy mam wedi bod yn rhan o hyn, rwy'n credu bod ei bywyd wedi'i gymryd oddi wrthi."

Heriau iechyd meddwl

Roedd y cwpl wedi priodi yn 1970 a chawsant ddau o blant, Martine a'i brawd Gethin.

Dywedodd Ms Stecker eu bod wedi cael plentyndod da, ond eu bod yn ymwybodol bod eu tad wedi cael trafferth gyda'i iechyd meddwl yn ddiweddar.

"Fe wnaeth o golli ei chwaer, digwyddodd rhywbeth yn ei weithle lle'r oedd o'n cael ei fwlio," meddai.

"Doedd gen i ddim pryderon ei fod o wir yn dioddef o iselder.

"Yr hyn oedd yn rhyfedd oedd pan oedd o'n dal i sôn am yr ewyllys, eisiau ei newid, ro'n i'n meddwl bod hynny'n rhyfedd ar y pryd.

"Fe wnes i ddiystyru'r peth oherwydd nad o'n i'n deall pam ei fod o eisiau ei newid yn sydyn ar ôl yr holl flynyddoedd."

Clywodd y llys fod Mrs Jefferies wedi dioddef o boen cronig ac wedi cymryd meddyginiaeth i drin hyn.

Fodd bynnag, roedd hi'n berson cymdeithasol oedd yn arfer cyfarfod â'i merch bob dydd Sadwrn.

"Byddem yn mynd i’r ganolfan arddio, mynd am goffi neu mynd i siopa, jyst pethau mam a merch," meddai Ms Stecker.

Pan gyrhaeddodd Ms Stecker y tŷ ar 5 Hydref, roedd y llenni wedi cau a’r allwedd yn y drws.

"Doedd gen i fawr o bryder o gwbl… Dwi ddim yn meddwl fy mod wedi sylweddoli'n syth," meddai.

Daeth Ms Stecker o hyd i gorff ci’r teulu cyn dod o hyd i’w mam yn gorwedd yn y gwely.

Perchennog gwn

Clywodd y llys fod gan Mr Jefferies sawl gwn gan ei fod yn arfer saethu colomennod clai a ffesantod.

Yn dilyn eu marwolaeth daeth i'r amlwg fod gan y cwpl ddyled o £35,000, er nad yw'n glir sut ddigwyddodd hyn.

Daeth crwner y rhanbarth Patricia Morgan, i'r casgliad bod y cwpl wedi marw o glwyfau saethu i'r pen.

Dywedodd fod marwolaeth Mrs Jefferies yn llofruddiaeth anghyfreithlon tra bod achos marwolaeth Mr Jefferies yn hunanladdiad.

"Mae'n debygol bod Mrs Jefferies wedi cael ei saethu gan ei gŵr cyn iddo fynd ymlaen i saethu ci'r teulu ac yna ei hun," meddai.

"Roedd gan ei gŵr rywfaint o iselder hanesyddol ac mae'n debyg ei fod yn dioddef o ddirywiad yn ei iechyd meddwl."

Ychwanegodd: "Roedd ganddyn nhw rai dyledion ariannol, ond nid yw'n hysbys i ba raddau yr oedd hyn wedi achosi straen neu bryder iddyn nhw."