Cadarnhaodd Heddlu Gogledd Cymru fod corff dynes wedi ei ddarganfod yn afon Dyfrdwy yn Llangollen fore Sadwrn.   

Yn ôl y llu, daeth galwad am 08:18, yn nodi bod corff wedi ei ddarganfod yn y dŵr. 

Fe aeth plismyn yno yn ogystal â gwasanaethau argyfwng eraill yn cynnwys y gwasanaeth tân.

Dywedodd yr Arolygydd Andy Kirkham o Heddlu Gogledd Cymru: "Mae ein meddyliau gyda theulu'r ddynes ar yr adeg anodd yma

"Rydym yn gwerthfawrogi fod y digwyddiad hwn wedi amharu ar drigolion y dref ac ymwelwyr heddiw, gan fod gŵyl fwyd y dref yn cael ei chynnal. 

"Hoffem ddiolch i bawb, yn cynnwys busnesau lleol, am eu hamynedd wrth i ni ymdrin â'r digwyddiad trasig hwn 

"Mae ymchwiliad ar y gweill er mwyn adnabod y ddynes yn ffurfiol" 

Ychwanegodd yr heddlu nad yw achos ei marwolaeth yn glir eto, ond y gred yw nad yw'r amgylchiadau'n amheus.

Mae'r crwner wedi ei hysbysu.