Mae'r seren bop fyd enwog Miley Cyrus wedi llongyfarch y cerddor Pino Palladino o Gaerdydd ar ennill gwobr gerddoriaeth arbennig yng Nghymru.

Bydd Pino Palladino yn derbyn gwobr Ysbrydoliaeth Cerddoriaeth Gymreig fis nesa' yn seremoni Gwobr Gerddoriaeth Gymreig.

Roedd wedi cyd-weithio ar albwm diwethaf Miley Cyrus, Something Beautiful, ac mae'r Cymro wedi chwarae gyda sêr eraill gan gynnwys Adele, Elton John a Harry Styles.

Dywedodd Miley Cyrus: "Roedd yn fraint i gael Pino i chwarae ar fy record ddiwethaf.

"Mae'n chwarae ar bob cân, gan gynnwys un sydd yn 13 munud o hyd.

"Dydw i ddim yn credu y byddwn ni wedi gwneud y gân honno heblaw am y ffaith bod neb eisiau i Pino stopio chwarae.

"Mae gweithio gyda Pino yn freuddwyd, mae'n wych bob tro."

Dywedodd ei fod yn "fraint bod fy ngwaith wedi cael ei gydnabod" trwy ennill y wobr hon.

Mae Dafydd Iwan, Pat Morgan o'r band Datblygu, Mike Peters a Meic Stevens wedi ennill y wobr yn y gorffennol.

Mae Palladino, sy'n dod o deulu Cymreig-Eidalaidd o berchnogion bwytai yn ardal Yr Eglwys Newydd y brifddinas bellach yn byw yn Los Angeles.

Mae'n un o'r chwaraewyr bas mwyaf enwog a poblogaidd yn y byd, ar ôl chwarae ar ddau o albymau mwyaf poblogaidd y ganrif yma, sef '21' gan Adele a 'Divide' gan Ed Sheeran.