Mae dyn wedi ei gludo mewn hofrennydd i’r ysbyty ar ôl dioddef anafiadau difrifol mewn gwrthdrawiad ar yr A55 yn Sir y Fflint.

Fe wnaeth yr heddlu dderbyn adroddiad am 2.14pm ddydd Sadwrn am wrthdrawiad un cerbyd yn ymwneud â Vauxhall Astra llwyd yn ardal Helygain.

Roedd yn ymuno â'r A55 tua'r dwyrain wrth Gyffordd 32 o’r A5026 pan wrthdrawodd â'r llain ganol.

Cafodd y dyn ei gludo mewn hofrennydd i'r ysbyty yn Stoke lle mae'n parhau i dderbyn triniaeth, meddai Heddlu Gogledd Cymru fore Sul.

Mae'r Rhingyll Leigh McCann o'r Uned Troseddau Ffyrdd bellach yn apelio am dystion.

"Rydym yn apelio at unrhyw un a welodd y gwrthdrawiad, neu a allai fod â lluniau camera dashfwrdd o'r digwyddiad, i gysylltu â ni,” meddai,

Dylai unrhyw un sydd â gwybodaeth gysylltu â swyddogion yn yr Uned Plismona Ffyrdd gan ddyfynnu'r rhif cyfeirnod C139596.