Mae Arlywydd America, Donald Trump, wedi dweud ei fod wedi gorchymyn i ddwy long danfor niwclear gael eu "lleoli yn y rhanbarthau priodol" mewn ymateb i sylwadau "pryfoclyd iawn" gan gyn-arlywydd Rwsia, Dmitry Medvedev.

Dywedodd Trump ei fod wedi gweithredu "rhag ofn bod y datganiadau ffôl hyn yn fwy na hynny yn unig. Mae geiriau sy'n cael eu defnyddio yn bwysig iawn, a gallant yn aml arwain at ganlyniadau anfwriadol, rwy'n gobeithio na fydd hwn yn un o'r achosion hynny".

Ni ddywedodd Trump ble yn union mae wedi gyrru'r ddwy long danfor, yn unol â phrotocol milwrol y America.

Mae Medvedev wedi bygwth America yn ddiweddar mewn ymateb i neges gan Trump, yn rhoi pwysau ar Moscow i gytuno i gadoediad yn yr Wcráin neu wynebu sancsiynau llym.

Mae gan Rwsia ac America, y storfa fwyaf o arfau niwclear yn y byd, ac mae gan y ddwy wlad fflyd o longau tanfor niwclear.

Yn neges ddydd Gwener ar blatfform cyfryngau cymdeithasol ei hun - Truth Social, ysgrifennodd Trump: "Yn seiliedig ar ddatganiadau pryfoclyd iawn cyn-arlywydd Rwsia, Dmitry Medvedev, sydd bellach yn ddirprwy gadeirydd Cyngor Diogelwch Ffederasiwn Rwsia, rwyf wedi gorchymyn i ddwy long danfor niwclear gael eu lleoli yn y rhanbarthau priodol."

Ni ddywedodd Trump a oedd yn cyfeirio at longau tanfor a redir gan bŵer niwclear, neu longau tanfor sydd â gallu i ymosod gydag arfau niwclear, ond wrth siarad â gohebwyr yn ddiweddarach yr un diwrnod, dywedodd Trump: "Gwnaed bygythiad, ac nid oeddem yn meddwl ei fod yn briodol. Felly mae'n rhaid i ni gyd fod yn ofalus iawn."