Mae disgwyl cawodydd trwm a mellt a tharanau yn rhai o siroedd y de dros y penwythnos.

Mae rhybudd melyn mewn grym i 16 o siroedd.

Bydd y rhybudd yn dod i rym am 18:00 ddydd Sadwrn ac yn parhau tan 21:00 ddydd Sul.

Dywedodd y Swyddfa Dywydd y byddai cawodydd, a stormydd taranllyd yn gallu arwain at oedi ar y ffyrdd.

Maen nhw'n rhybuddio am amodau gyrru heriol oherwydd dŵr ar y ffyrdd.

Hefyd mae'n bosibl y bydd oedi i wasanaethau trên a bws.

"Bydd disgwyl cawodydd trwm ledaenu ar draws de Cymru o’r dwyrain yn gynnar fore sul," meddai llefarydd ar ran y Swyddfa Dywydd.

"Fe allai 30-35mm o law ddisgyn mewn rhai oriau, gyda 70mm mewn rhai mannau."

Bydd y rhybudd yn effeithio ar y siroedd canlynol:

• Abertawe

• Sir Benfro

• Blaenau Gwent

• Bro Morgannwg

• Casnewydd

• Castell-nedd Port Talbot –

• Caerffili

• Caerdydd

• Ceredigion

• Sir Gaerfyrddin

• Merthyr Tudful

• Mynwy

• Pen-y-bont

• Powys

• Rhondda Cynon Taf

• Torfaen

Mae'r Swyddfa Dywydd hefyd wedi cyhoeddi rhybudd melyn ar gyfer sir Wrecsam fydd yn dod i rym rhwng 11:00 a 21:00 ddydd Llun.