Mae'r cynllun sydd yn cael ei ffafrio ar gyfer ailosod Pont Afon Dyfrdwy ar yr A494 wedi'i gadarnhau gan Lywodraeth Cymru.

Fe gafodd ymgynghoriad cyhoeddus ei gynnal a oedd yn edrych ar bum opsiwn posibl ar gyfer ailosod Pont Afon Dyfrdwy.

Opsiwn E berfformiodd orau yn yr ymgynghoriad a dyma’r opsiwn mwyaf fforddiadwy.

Mae ganddo hefyd ôl troed amgylcheddol is a dyma'r un mwyaf ymarferol i'w gyflawni, yn ôl y Llywodraeth.

Bydd yn darparu strwythur sengl newydd ynghyd â darpariaeth lawn ar gyfer teithio llesol ar y bont newydd. 

Yn ôl y Llywodraeth, mae angen pont newydd gan fod y gofyn am waith atgyweirio a’r risg o fod angen cau’r bont er mwyn gwaith sylweddol yn cynyddu o flwyddyn i flwyddyn.

Mae disgwyl i’r gwaith adeiladu ddechrau diwedd 2026 i ddechrau 2027.

Dywedodd Ken Skates, Ysgrifennydd y Cabinet dros Drafnidiaeth a Gogledd Cymru, fod trwsio ffyrdd “yn flaenoriaeth i’r llywodraeth hon.”

Ychwanegodd eu bod am “symud ymlaen” gyda’r cynlluniau ar gyfer ailosod Pont Dyfrdwy ar yr A494.

“Rwy'n falch heddiw o allu cyhoeddi'r opsiwn a ffefrir, sef yr opsiwn mwyaf cost-effeithiol ac sydd â'r effaith amgylcheddol leiaf.”

“Gall y cynlluniau nawr symud ymlaen i'r cam nesaf gyda'r bwriad o gyhoeddi'r gorchmynion drafft yn ddiweddarach eleni.” meddai.

“Ynghyd â'n cynlluniau ar gyfer gwella teithio ar fysiau a threnau yn y rhanbarth, bydd y bont newydd yn cryfhau'r seilwaith trafnidiaeth yng ngogledd Cymru ymhellach."