Mae Llywodraeth Prydain wedi croesawu penderfyniad Donald Trump i beidio codi 50% o dariff ar fewnforion alwminiwm a dur.

Fe fydd y tariff yn 25% i Brydain tra bod gwledydd eraill yn gorfod talu dwbl hynny.

Mae’r gorchymyn gan Arlywydd America newydd ddod i rym.

Fe benderfynodd Arlywydd yr Unol Daleithiau i “ddarparu triniaeth wahanol” i Brydain ar ôl cytundeb rhyngddyn nhw fis diwethaf.

Tra’n croesawu’r penderfyniad i beidio gosod tariff o 50% mae’r diwydiant yn rhybuddio bod yna dal “ansicrwydd” ynglŷn â’r gyfradd derfynol.

Dyw’r cytundeb rhwng Prydain ac America ddim wedi dod i rym eto.

Mae yna dal bosibilrwydd o osod tariff o 50% o fis Gorffennaf ar allforion dur o Brydain. Mae Donald Trump wedi dweud y gallai gynyddu'r tariff os yw'n penderfynu nad yw Prydain wedi "cydymffurfio gydag agweddau" o'r cytundeb.

Nos Fawrth fe ddywedodd Llywodraeth y DU eu bod yn “falch” na fydd y diwydiant yn gorfod talu tariffau ychwanegol. 

Fe ddywedodd llefarydd eu bod wedi "ymrwymo i warchod busnesau Prydain a swyddi". 

Maent hefyd yn dweud y byddant yn parhau i "weithio gyda'r UDA i weithredu'r cytundeb, fydd yn gweld y tariffau 25% ar ddur yn cael eu dileu". 

Ond mae’r Ceidwadwyr wedi dweud bod y gorchymyn yn “ergyd arall”.