Mae aelodau Cabinet Gwynedd wedi pleidleisio o blaid gwahodd Eisteddfod yr Urdd i’r sir yn 2028. 

Mewn cyfarfod ddydd Mawrth, fe bleidleisiodd pob aelod o’r Cabinet o blaid croesawu’r ŵyl i Wynedd, gan olygu y bydd bellach yn cyflwyno’r cais i’r Urdd. 

Dywedodd Arweinydd y Cyngor Sir, Nia Jeffreys ei bod yn gallu “teimlo’r brwdfrydedd yn y ‘stafell.” 

Yn ystod y bleidlais, fe wnaeth y Cabinet hefyd gymeradwyo’r penderfyniad i gyfrannu £200,000 o’r gronfa trawsffurfio tuag at gostau cynnal yr ŵyl. 

Dywedodd Ffion Mai Jones, a gyflwynodd yr adroddiad ar wahodd Eisteddfod yr Urdd i’r cabinet: “Er y cyfraniad ariannol mae’r gwerth economaidd i’r ardal yn llawer mwy na hynny wrth gwrs.” 

Gwerth economaidd Eisteddfod yr Urdd yn 2023 oedd £16m i Gymru ac roedd dros £8.5m o’r cyfanswm hwnnw yn ardal leol yr Eisteddfod Genedlaethol yn Sir Gâr, medd yr adroddiad. 

Dyw’r bleidlais o blaid ddim yn golygu y bydd yr Eisteddfod o reidrwydd yn dod i Wynedd, na chwaith yn penderfynu lle yng Ngwynedd y bydd yr Eisteddfod yn cael ei chynnal.

Mae gofyn i awdurdodau lleol fynegi eu diddordeb i gynnal Eisteddfod bob pum mlynedd yn arferol, er mwyn gallu cynllunio ymlaen a rhannu’r baich ar draws Awdurdodau Lleol Cymru.

Hanes yr Eisteddfod yng Ngwynedd

Cafodd Eisteddfod yr Urdd ei chynnal ddiwethaf yn y sir dros ddegawd yn ôl,  yn y Bala yn 2014.

Yn ogystal â’r Bala mae Gwynedd wedi cynnal eisteddfodau yng Nglynllifon yn 2012 a Phen Llŷn yn 1998 yn y 30 mlynedd diwethaf.

Mae hefyd wedi cynnal pedair Eisteddfod Genedlaethol, yn 2023, 2009, 2005 ac 1997.

Mae dau ranbarth Urdd yng Ngwynedd - Eryri (Arfon/Dwyfor) a Meirionnydd.