Mae Wrecsam wedi creu hanes drwy sicrhau dyrchafiad i'r Bencampwriaeth ddydd Sadwrn. 

Enillodd tîm Phil Parkinson o 3-0 yn erbyn Charlton gyda goliau gan Ollie Rathbone a Sam Smith yn sgorio ddwywaith.

Dyma'r tro cyntaf i dîm proffesiynol sicrhau dyrchafiad mewn tri thymor yn olynol. 

Mae'r fuddugoliaeth yn erbyn Charlton yn golygu fod gan Wrecsam 89 o bwyntiau yn yr ail safle, a Wycombe a Stockport yn gydradd drydydd gyda 84 pwynt. 

Gydag un gêm i fynd tan ddiwedd y tymor, mae'r fuddugoliaeth wedi sicrhau y bydd Wrecsam yn chwarae yn y Bencampwriaeth y tymor nesaf. 

Dau safle awtomatig sydd ar gael am ddyrchafiad i'r Bencampwriaeth, ac mae Birmingham eisoes wedi cael eu dyrchafu. 

Fe gafodd clwb pêl-droed Wrecsam ei drawsnewid wedi i'r sêr o Hollywood Ryan Reynolds a Rob McElhenney brynu'r clwb yn 2021.

Roedd y perchnogion o Hollywood yn bresennol i gefnogi'r tîm ar y Cae Ras ddydd Sadwrn. 

Wedi 87 mlynedd yn y Gynghrair Bêl-droed, fe ddisgynnodd Wrecsam i'r Gynghrair Genedlaethol yn 2008. 

Enillodd Wrecsam y Gynghrair Genedlaethol yn 2023 cyn mynd ymlaen i sicrhau dyrchafiad o Adran Dau y tymor wedyn. 

Bellach, fe fyddan nhw'n chwarae yn y Bencampwriaeth y tymor nesaf ar ôl cael eu dyrchafu o Adran Un.