Mae teulu dyn a fu farw wedi gwrthdrawiad ar yr A55 ym Modelwyddan yr wythnos diwethaf wedi rhoi teyrnged iddo. 

Roedd David Emrys ‘Junior’ Williams yn 35 oed ac yn dod o ardal Cyffordd Llandudno. 

Cafodd dyn 62 oed ei arestio mewn cysylltiad â'i farwolaeth, ac mae bellach wedi ei ryddhau o dan ymchwiliad wrth i ymholiadau barhau. 

Mewn teyrnged iddo, dywedodd ei deulu: "Roedd David yn fab annwyl i Sharon a David, brawd i Gemma a James, tad arbennig i Harry, Henry a Hayden a chyn-bartner i Jenny. 

"Does dim geiriau i egluro cymaint y mae ein calonnau wedi eu torri, ac fe fydd dy deulu a dy ffrindiau yn dy fethu gymaint."

Mae'r ymchwiliad i sefydlu achos y gwrthdrawiad yn parhau ac mae swyddogion yn apelio am dystion i'r gwrthdrawiad a ddigwyddodd yn ystod oriau mân fore Mawrth, 15 Ebrill ar lôn orllewinol yr A55 ger Gwasanaethau Cinmel ym Modelwyddan.

Mae'r Heddlu yn annog unrhyw un â gwybodaeth i gysylltu gan ddefnyddio'r cyfeirnod 25000307865.