Mae ci wedi cael ei achub o glogwyn ym Môn ar ôl mynd yn sownd wrth redeg ar ôl oen.

Cafodd Gwylwyr y Glannau Moelfre a Phenmon ei alw i'r clogwyn ar Draeth Bychan am 11:30 fore Gwener.

Wrth gyrraedd, roedd perchnogion y ci wedi rhoi cymorth i wylwyr y glannau wrth ddod o hyd i union leoliad y ci a'r oen oedd yn sownd ar y clogwyn serth.

Roedd y clogwyn wedi'i orchuddio â choed, canghennau a llwyni.

Wrth i'r timoedd gwylwyr y glannau baratoi i achub y ci, roedd ffarmwr lleol wedi gwneud ei ffordd trwy'r coed a llwyni i achub yr oen oedd wedi ei anafu.

Ond roedd y ci yn sownd ar ddibyn cul oedd allan o afael y ffarmwr.

Image

Dywedodd gwylwyr y glannau bod y ffarmwr wedi dychwelyd i ddangos union leoliad y ci wedi iddo achub yr oen.

"Roeddem wedi ystyried achub y ci o ochr y traeth yn hytrach na'r ochr arall," meddai llefarydd ar ran Gwylwyr y Glannau Moelfre.

"Ar ôl clirio llwybr yn y coed a'r llwyni, roedd y tîm wedi cyrraedd y ci, oedd wedi ofni.

"Yn araf bach roeddem wedi ei symud o'r dibyn ac yn defnyddio hen ddarn o raff, creu tennyn oedd yn ein galluogi i gerdded y ci yn ôl i'w pherchnogion."

Diolchodd Gwylwyr y Glannau Moelfre i Wylwyr y Glannau Penmon a'r ffarmwr am eu cymorth wrth achub yr anifeiliaid.