Mae Undeb Rygbi Cymru wedi cyhoeddi cynllun ail-strwythuro a fydd yn arwain at golli hyd at 20 o swyddi. 

Gobaith yr Undeb ydy y bydd ei strategaeth bum mlynedd 'Un Cymru', sy'n cynnwys adran berfformiad newydd, yn gwella sefyllfa ariannol yr undeb ac arbed hyd at £5m y flwyddyn.

Daw hyn wedi i Undeb Rygbi Cymru gymryd rheolaeth ar Rygbi Caerdydd wedi i'r clwb gael ei roi yn nwylo’r gweinyddwyr am gyfnod. 

Wrth gyhoeddi'r cynllun ail-strwythuro, dywedodd Prif Weithredwr yr Undeb, Abi Tierney: "Fe fydd yna fuddsoddiad mewn meysydd allweddol a fydd yn galluogi tyfiant, wrth i ni gwblhau ein cynllun trawsnewid. Yn anffodus, fe fydd yna nifer fach o swyddi yn cael eu colli. 

"Byddwn yn sicrhau ein bod yn edrych ar ôl y bobl sydd wedi'u heffeithio gan y newidiadau hyn ac yn gwneud popeth o fewn ein gallu i sicrhau eu lles yn ystod y broses ymgynghori."

Inline Tweet: https://twitter.com/WelshRugbyUnion/status/1910288932815700445?ref_src=twsrc%5Egoogle%7Ctwcamp%5Eserp%7Ctwgr%5Etweet

Ychwanegodd yr Undeb y bydd 'adran berfformiad ar ei newydd wedd' yn sicrhau cysylltiad rhwng timau cenedlaethol Cymru, y clybiau proffesiynol a'r llwybrau i chwaraewyr.

Dywedodd yr Undeb na fydd cymryd rheolaeth o Rygbi Caerdydd yn effeithio ar gynlluniau i ail-adeiladu'r gêm broffesiynol.

Bydd yr Undeb yn chwilio am fuddsoddwyr dros y misoedd nesaf i sicrhau fod "Caerdydd yn dychwelyd i chwarae ar frig tabl rygbi clwb."

Ychwanegodd Abi Tierney: "Mae popeth yr ydym ni'n ei wneud er mwyn gwella rygbi yng Nghymru i bawb.

"Fe wnaeth y gêm ryngwladol droi yn broffesiynol ym 1995 ond 2025 fydd y foment y byddwn yn cofio rygbi Cymru yn cwblhau y trawsnewidiad yma, i fod yn sefydliad gwbl broffesiynol, cwbl weithredol ac addas i bwrpas."