Mae grant gan Lywodraeth Cymru yn rhoi cyfle i ysgolion uwchradd ddatblygu mwy o athrawon sy’n medru siarad Cymraeg.

Y bwriad yw taclo problemau staffio tymor byr a chynyddu nifer y staff sydd yn medru siarad yr iaith meddai’r llywodraeth. 

Mae’r grant ar gyfer Medi 2025 ymlaen a bydd £900,000 ar gael ar gyfer y flwyddyn academaidd honno. 

Y llynedd cafodd 55 o grantiau eu rhoi i ysgolion uwchradd Cymru. Yn eu plith roedd Ysgol Rhydywaun yn Aberdâr.

Fe ddefnyddiodd yr ysgol yr arian i gynnig dau bwnc Safon Uwch ychwanegol yn y Gymraeg, sef Seicoleg a Throseddeg. 

Fe wnaethon nhw hefyd gydweithio gydag ysgolion cyfagos i ddatblygu gweithgareddau i gyfoethogi iaith yr athrawon. 

Dywedodd y Pennaeth, Lisa Williams: "Yma, yn Rhydywaun, mae'r grant i ddatblygu capasiti'r gweithlu addysg wedi sicrhau bod gennym ddarpariaeth ac adnoddau o ansawdd uchel i'n disgyblion a chyfleoedd dysgu proffesiynol llwyddiannus i'n staff.

"Diolch i'r grant rydym wedi gallu sicrhau ein bod yn rhagweithiol wrth recriwtio a chadw athrawon a datblygu arbenigedd o fewn y proffesiwn. 

"Oherwydd hynny, gwelwyd gwelliant ym mherfformiad a chyflawniad academaidd y disgyblion." 

Mae Llywodraeth Cymru yn dweud bod yr ysgolion eraill wedi elwa trwy gynnig cyfleoedd i bobl ifanc gael profiad gwaith yn ystod blwyddyn allan neu brentisiaethau mewn ysgolion cyfrwng Cymraeg. 

'Cyrraedd eu potensial'

Fe wnaeth rhai ysgolion gydweithio i gynnig hyfforddiant proffesiynol i fod yn athrawon, yn enwedig mewn pynciau lle mae prinder. 

Roedd y grantiau hefyd wedi golygu bod modd i fyfyrwyr israddedig gael profiad o fod mewn dosbarth a’u hannog i ystyried bod yn athrawon fel swydd. 

Dywedodd Ysgrifennydd y Cabinet dros Addysg, Lynne Neagle: "Mae datblygu gweithlu i addysgu Cymraeg fel pwnc, a darparu addysg drwy gyfrwng y Gymraeg, yn hanfodol er mwyn creu mwy o siaradwyr Cymraeg. Mae'r grant hwn yn un o'r cynlluniau arloesol sydd gennym ar waith i gyflawni hynny.

"Rwy'n benderfynol o sicrhau ein bod yn cefnogi dysgwyr i gyrraedd eu potensial llawn ac yn darparu'r cyfleoedd datblygu proffesiynol sydd eu hangen ar athrawon i barhau i godi safonau yn ein hysgolion."