Roedd merch bedair oed fu farw yn Llangynnwr, Sir Gaerfyrddin wedi ei chanfod yn ddiymadferth mewn bath yn ei chartref, clywodd cwest heddiw.

Cafodd cwest Cali Marged Lewis-Mclernon ei agor a'i ohirio gan Paul Bennett, Uwch Grwner Sir Gaerfyrddin a Sir Benfro, yn Neuadd y Dref Llanelli fore Llun.

Dywedodd Hayley Rogers, Swyddog y Crwner yn Heddlu Dyfed-Powys, wrth y gwrandawiad fod yr heddlu wedi derbyn galwad am 17.59 ar Chwefror 20 gan Wasanaeth Ambiwlans Cymru yn gofyn am gymorth oherwydd bod merch bedair oed oedd wedi cael "ataliad ar y galon” wedi cael ei chanfod yn “ddiymadferth yn y bath.”

Fe gafodd y ferch ei chludo i Ysbyty Glangwili, ond bu farw am 2.45 y bore canlynol.

Cafodd dynes 41 oed ei holi ar amheuaeth o ddynladdiad drwy esgeulustod difrifol ar ôl marwolaeth y ferch ond mae hi bellach wedi ei rhyddhau. 

Mae’r cwest wedi ei ohirio nes mis Mehefin, ac mae ymchwiliad yr heddlu yn parhau.