Dywedodd Llywodraeth Cymru bod recriwtio gweithwyr gofal iechyd o'r dalaith yn ne-orllewin India yn galluogi GIG Cymru i "elwa ar gyfoeth o wybodaeth".

Mae'r ymgyrch recriwtio yn rhan o gytundeb rhwng Llywodraeth Cymru a Llywodraeth Kerala a gafodd ei lofnodi ym mis Mawrth 2024.

Ers hynny, mae mwy na 300 o weithwyr gofal iechyd o Kerala wedi derbyn swyddi ar draws GIG Cymru.

Y bwriad yw "ymrwymo i barhau i fuddsoddi yn y gweithlu" ac i "hyfforddi gweithlu’r GIG ar gyfer y dyfodol".

'Edrych ymlaen'

Mae Teena Thomas, nyrs o Karunagappally yn Kerala, yn un o'r rhai sy'n ymuno â GIG Cymru.

Dywedodd: "Rydw i’n edrych ymlaen yn fawr at fod yn rhan o dîm sy’n meddwl bod agwedd dosturiol, caredigrwydd a pharch mor bwysig. 

"Mae cael y cyfle i weithio mewn amgylchedd amlddiwylliannol a chyfrannu at les y gymuned yng Nghymru wir yn rhoi boddhad. 

"Rydw i’n edrych ymlaen at ddatblygu fy sgiliau a’m harbenigedd mewn amgylchedd gwaith cefnogol a chynhwysol."

Dywedodd Jeremy Miles, Ysgrifennydd y Cabinet dros Iechyd, ei fod yn croesawu'r cytundeb diweddaraf.

"Rydw i’n falch y bydd 200 yn rhagor o weithwyr gofal iechyd proffesiynol o Kerala yn chwarae rhan bwysig i gefnogi GIG Cymru," meddai.

"Byddan nhw’n ymuno â’r rheini sydd wedi cael eu recriwtio i’n system gofal iechyd yn barod."

Ychwanegodd ei fod yn "edrych ymlaen" at barhau i gydweithio gyda Llywodraeth Kerala yn y dyfodol.