Mae dyn 25 oed wedi’i gyhuddo yn dilyn ymgyrch i amharu ar werthu cyffuriau 'County Lines' ym Mangor.

Yn ystod cyrch gan yr heddlu yn y ddinas ddydd Mercher, cynhaliwyd camau i stopio ag archwilio unigolion yn y ddinas.

Daeth Heddlu'r Gogledd o hyd i lawer iawn o'r hyn y maen nhw'n ei gredu sydd yn gyffuriau Dosbarth A a B, a chyllell fawr.

Cafodd Callum Kinney, o Ffordd Lightbowne, Manceinion ei arestio, ac fe gafodd ei gyhuddo o fod â chyllell yn ei feddiant gyda'r bwriad o gyflenwi cocên, heroin a chanabis oedd yn ei feddiant.

Cafodd Kinney ei gadw yn y ddalfa cyn iddo ymddangos yn Llys Ynadon Llandudno fore dydd Gwener.

Mae'r arfer o groesi ffiniau siroedd i werthu cyffuriau gan ddefnyddio ffonau symudol yn cael ei adnabod fel 'county lines' gan yr awdurdodau.

Yn aml mae gangiau mewn dinasoedd fel Lerpwl, Llundain, Manceinion a Birmingham yn defnyddio pobl fregus a phlant i gludo a gwerthu'r cyffuriau ar eu rhan.

Dywedodd yr Arolygydd Ardal Ian Roberts: “Gall y pŵer stopio a chwilio hwn amharu ar droseddu sydd wedi ei drefnu o flaen llaw a helpu i gymryd cyffuriau ac arfau oddi ar ein strydoedd.

“Does dim lle i gyffuriau na thrais yn ein cymuned a bydd camau pellach yn parhau yn ystod y misoedd nesaf yn ein hardal.

“Rydym wedi ymrwymo i greu amgylchedd elyniaethus i unrhyw un sy’n credu y gallant ecsbloetio ein cymuned.

“Os oes gennych unrhyw wybodaeth am droseddu yn ein hardal, cysylltwch â ni ar 101, neu drwy ein gwefan.

“Fel arall, gallwch gysylltu â’r elusen annibynnol Crimestoppers, 100% yn ddienw ar 0800 555 111.”