Mae person wedi marw yn dilyn tân mewn fflat ym Mhontcanna, Caerdydd.

Cafodd criwiau'r Gwasanaeth Tân, parafeddygon a swyddogion yr heddlu eu galw i'r fflat ar Ffordd Conway am 18:15 nos Sul.

Mae Heddlu De Cymru wedi cadarnhau bod un person wedi marw.

Dywedodd llefarydd ar ran y llu eu bod yn "ymchwilio i dân ar Ffordd Conway ym Mhontcanna, Caerdydd.

"Nid yw'n ymddangos fod unrhyw amgylchiadau amheus ar hyn o bryd."

Ychwanegodd y llu bod teulu'r person wedi cael gwybod am y farwolaeth.

Nid oes rhagor o wybodaeth am y digwyddiad wedi cael ei ddatgelu hyd yma.

Llun: Media Wales