Storm Éowyn: Rhybuddion melyn ac oren i Gymru ddydd Iau a Gwener
Mae'r Swyddfa Dywydd wedi cyhoeddi rhybudd melyn am wynt i orllewin Cymru ddydd Iau a rhybudd oren yn y gogledd ddydd Gwener.
Bydd y rhybudd melyn ddydd Iau yn dod i rym am 7:00 ac yn dod i ben am 18:00.
Bydd glaw trwm yn disgyn yn y gorllewin cyn symud ar draws i’r dwyrain, yn ogystal â 4-5 awr o wyntoedd cryfion.
Mae disgwyl i’r gwyntoedd gyrraedd 50-60 mya dros arfordiroedd a bryniau agored.
Bydd y gwyntoedd yn cyrraedd ardaloedd gorllewinol yn ystod y bore, cyn lleddfu yn ystod y prynhawn.
Bydd ardaloedd dwyreiniol yn gweld gwyntoedd ar eu hanterth yn ystod y prynhawn.
Bydd y rhybudd yn effeithio ar y siroedd canlynol:
- Pen-y-bont ar Ogwr
- Caerdydd
- Sir Gaerfyrddin
- Ceredigion
- Conwy
- Gwynedd
- Ynys Môn
- Sir Fynwy
- Castell-Nedd Port Talbot
- Casnewydd
- Sir Benfro
- Abertawe
- Bro Morgannwg
Rhybudd Oren
Mae’r Swyddfa Dywydd hefyd wedi cyhoeddi rhybudd oren am wyntoedd cryfion yn y gogledd ddydd Gwener.
Mae disgwyl i Storm Éowyn ddod â gwyntoedd cryfion ac aflonyddwch eang ddydd Gwener rhwng 06:00 a 21:00.
Mae toriadau pŵer yn debygol o ddigwydd, gyda'r peryg y gallai effeithio ar wasanaethau eraill, megis signal ffonau symudol.
Mae gwasanaethau ffyrdd, rheilffyrdd, awyr a fferi yn debygol o gael eu heffeithio, gydag amseroedd teithio hirach a chanslo'n bosibl. Mae perygl y gallai rhai ffyrdd a phontydd gau.
Mae siawns y gallai difrod i adeiladau a chartrefi ddigwydd, ac fe allai effeithio ar gyflenwadau trydan.
Bydd y rhybudd oren ddydd Gwener yn effeithio ar y siroedd canlynol:
