Mae babi saith mis oed wedi marw ar ôl i gar golli rheolaeth ar ffordd ddeuol a tharo coeden.

Mae’r heddlu’n ymchwilio i weld a oedd y ddamwain yn gysylltiedig ag amodau rhewllyd.

Cafodd yr heddlu eu galw i wrthdrawiad un cerbyd, Honda Jazz melyn, ar yr A1 ger Grantham yn Swydd Lincoln am 22:50yh ddydd Iau, 2 Ionawr.

Gadawodd y car y ffordd gerbydau tua'r de tua 500 llath o gyffordd Spittlegate, cyn taro coeden a dod i stop ar y ffordd.

Cafodd y bachgen bach ei gludo i’r ysbyty ond cyhoeddwyd ei fod wedi marw toc wedi 5:00 ddydd Gwener, meddai Heddlu Swydd Lincoln.

Cafodd dynes oedd hefyd yn teithio yn yr un car anafiadau difrifol, tra bod dau arall wedi osgoi anafiadau difrifol.

Dywedodd llefarydd ar ran Heddlu Swydd Lincoln: “Cafodd y ffordd ei chau i’r ddau gyfeiriad tra bod y gwasanaethau brys yn gweithio, ac mae’r ffordd gerbydau tua’r de yn parhau i fod ar gau gan yr Adran Priffyrdd wrth iddyn nhw wneud gwaith ymchwilio ar hyd ochr y ffordd.”

Ychwanegodd yr heddlu eu bod nhw'n "cadw meddwl agored, ond yn ystyried a oedd hyn yn gysylltiedig ag amodau rhewllyd ar y ffordd gerbydau yn yr ardal honno".

“Rydym yn gofyn am help gan unrhyw un a allai fod wedi bod yn gyrru yn yr ardal honno dros y dyddiau diwethaf i gysylltu â gwybodaeth neu gamera dash sydd ganddynt sy’n dangos yr amodau dros y dyddiau diwethaf," medden nhw.

“Byddem hefyd yn awyddus i weld unrhyw ffilm o’r gwrthdrawiad ei hun ac yn gofyn i unrhyw un a oedd yn teithio yn yr ardal honno nad ydym wedi siarad â nhw eto i gysylltu.”

Mae teulu’r babi yn cael cymorth gan swyddogion arbenigol.