Mae mam o Gendros, Abertawe wedi ymddangos o flaen llys wedi ei chyhuddo o lofruddio ei mab chwech oed a cheisio llofruddio ei thad.

Fe wnaeth Karolina Zurawska, 41 oed o Gendros, Abertawe, ymddangos gerbron Llys y Goron Abertawe fore Gwener.

Mae hi wedi’i chyhuddo o lofruddio ei mab Alexander Zurawski a gafodd ei ddarganfod yn farw mewn eiddo yn Gendros ar Awst 29.

Mae hi hefyd wedi’i chyhuddo o geisio llofruddio ei thad, Krzysztof Siwi, 67, yn gynharach yr un diwrnod.

Fe ymddangosodd Zurawska trwy gyswllt fideo o'r ddalfa ar gyfer y gwrandawiad byr gerbron y Barnwr Paul Thomas.

Ni ofynnwyd iddi bledio i'r ddau gyhuddiad yn ei herbyn.

Dywedodd y barnwr na fyddai yr achos llys yn cychwyn ar Chwefror 17 fel yr oedd wedi bwriadu yn wreiddiol er mwyn rhoi cyfle i adroddiadau pellach gael eu casglu.

Bydd gwrandawiad byr i drafod manylion yr achos yn cael ei gynnal ar y dyddiad hwnnw yn lle.

Dywedodd y Barnwr Thomas wrth y llys: “Rwy’n gobeithio ar y dyddiad hwnnw y bydd modd gweld cynnydd un ffordd neu’r llall, hyd yn oed os mai dim ond pennu dyddiad treial newydd fydd hynny.”

Ymddangosodd Mike Jones KC ar ran yr erlyniad yn ystod y gwrandawiad, tra bod John Hipkin KC yn cynrychioli Zurawska.

‘Bachgen hynod annwyl a phoblogaidd’

Mewn datganiad a gyhoeddwyd gan Heddlu De Cymru yn dilyn ei farwolaeth, disgrifiodd teulu Alexander ef fel “plentyn caredig iawn”.

“Roedd wrth ei fodd yn chwarae gyda’i chwaer fach ac yn chwarae gyda’i gi, Daisy.

“Roedd Alexander bob amser yn ymddwyn yn dda a byth yn ddrwg.

“Roedd yn glyfar iawn ac yn aeddfed iawn am ei oedran. Roedd ganddo ddealltwriaeth wych o ffeithiau.

“Roedd Alexander bob amser yn barod i helpu, bob amser yn awyddus i helpu gyda choginio a glanhau."

Ychwanegodd y deyrnged: “Roedd Alexander yn siarad Saesneg a Phwyleg a byddai’n aml yn cywiro ei rieni gyda’u Saesneg os oedden nhw’n cael geiriau’n anghywir.

“Roedd yn anhygoel.”