Mae dyn 49 oed wedi ymddangos yn y llys ddydd Sadwrn wedi’i gyhuddo o lofruddio dwy ddynes ym Milton Keynes ar ddydd Nadolig.

Fe wnaeth Jazwell Brown, o Heol Santa Cruz, Bletchley, ymddangos mewn gwrandawiad byr yn Llys Ynadon High Wycombe.

Mae'r heddlu wedi cadarnhau mai Joanne Pearson, 38 oed, a Teohna Grant, 24 oed, oedd y ddwy a fu farw.

Mae Mr Brown hefyd wedi’i gyhuddo o ddau gyhuddiad o geisio llofruddio ac un cyhuddiad yr un o fod â chyllell yn ei feddiant mewn man cyhoeddus ac achosi dioddefaint diangen i anifail mewn cysylltiad â’r digwyddiad, meddai Heddlu Thames Valley.

Bydd yn ymddangos nesaf yn Llys y Goron Luton ddydd Mawrth ar ôl iddo gael ei gadw yn y ddalfa.

Cafodd swyddogion eu galw tua 18:30 ddydd Mercher.

Bu farw’r ddwy ddynes mewn ymosodiad trywanu honedig tra bod dyn yn ei 20au hwyr a bachgen yn ei arddegau yn yr ysbyty gydag anafiadau difrifol.

Dywedodd yr heddlu yn flaenorol fod ci oedd wedi ei anafu yn y digwyddiad wedi marw, ond maen nhw wedi cael gwybod ers hynny ei fod wedi goroesi.

Cadarnhaodd yr heddlu eu bod yn cefnogi teuluoedd y rhai dan sylw.

Y gred yw bod y dyn a'r bachgen yn eu harddegau mewn cyflwr sefydlog yn yr ysbyty erbyn hyn.

Prif lun: Teohna Grant (chwith), a Joanne Pearson (dde)