Fe wnaeth dau berson dioddef anafiadau llosgi ac effeithiau anadlu mwg yn dilyn ffrwydrad ar gwch yn ardal Wrecsam nos Sadwrn.

Cafodd y ddau eu cludo i’r ysbyty yn dilyn tân ar gwch ym marina’r Waun. Y gred yw mai ffrwydrad nwy oedd yn gyfrifol am achosi’r tân.

Bu farw ci oedd ar fwrdd y cwch pleser adeg y ffrwydrad.

Cafodd Gwasanaeth Tân ac Achub y Gogledd eu galw i’r gamlas am tua 18.10 er mwyn mynd i’r afael â’r tân.

Roedd dau griw o Wrecsam a'r uned achub dŵr o Lannau Dyfrdwy yn bresennol, medden nhw. 

Mewn datganiad ychwanegodd Gwasanaeth Tân y Gogledd bod 80% o ddifrod wedi’i achosi i’r cwch. 

Image

Roedd y tân hefyd wedi lledaenu gan achosi 20% o ddifrod pellach i gwch camlas gyfagos. 

Fe ddioddefodd y ddau berson gydag effeithiau anadlu mwg a llosgiadau arwynebol.

Lluniau: Gwasanaeth Tân y Gogledd