Mae dyn 49 oed wedi’i garcharu am fwy na dau ddegawd am ymosodiad rhyw difrifol yn erbyn plentyn yng ngogledd Cymru.

Cafwyd Guy Lawrence Miles, o Palmerston Road, Bournemouth, yn euog o dri chyhuddiad o dreisio ac ymosod yn anweddus, gan Lys y Goron Caernarfon ddydd Iau.

Cafodd ei ddedfrydu i 22 mlynedd yn y carchar.

Fe lansiodd yr heddlu ymchwiliad i Miles ym mis Chwefror 2021 yn dilyn adroddiad ei fod wedi treisio plentyn ar ddiwedd y nawdegau ym Mangor.

Ar ôl meithrin perthynas amhriodol â’r dioddefwr, aeth ymlaen i ymosod arni’n dreisgar a’i cham-drin dros ddwy flynedd, gan adael gormod o ofn arni i amddiffyn ei hun neu adrodd amdano.

Pan ddychwelodd i ardal Bangor yn oedolyn rai blynyddoedd yn ddiweddarach, fe wnaeth Miles ei dilyn a’i tharo’n anymwybodol cyn iddo gael ei erlid i ffwrdd gan aelodau’r cyhoedd.

Fe fydd yn rhaid i Miles dreulio dwy ran o dair o'i ddedfryd cyn cael ei ystyried ar gyfer ei ryddhau.

Cafodd hefyd orchymyn atal amhenodol er mwyn amddiffyn y dioddefwr a gorchymyn atal niwed rhywiol am 30 mlynedd. 

Dywedodd y Ditectif Gwnstabl Chris Renshaw: “Roedd hwn yn achos erchyll lle y gwnaeth dyn llawer hŷn feithrin perthynas amhriodol gyda phlentyn bregus ac fe wnaeth y plentyn ddioddef y trais rhywiol mwyaf ofnadwy dros gyfnod hir.

“Hoffwn ddiolch iddi am ei dewrder wrth riportio’r troseddau a darparu tystiolaeth o dan amgylchiadau mor anhygoel o anodd. 

“Rwy’n gobeithio y gall y dioddefwr ddod o hyd i rywfaint o gysur yn y ddedfryd heddiw a dechrau symud ymlaen â’i bywyd heb unrhyw ofn pellach.

“Anogir unrhyw un sydd wedi dioddef cam-drin rhywiol, waeth pa mor bell yn ôl, i ddod ymlaen. Bydd rhywun yn gwrando arnoch chi ac yn cael cefnogaeth lawn.”