Roedd ffordd yng Ngwynedd ar gau nos Sadwrn gan fod y gwasanaethau brys wedi ymateb i dân gerllaw.

Dywedodd Heddlu Gogledd Cymru bod ffordd yr A497 ger safle Evans Caravans and Camping yn Chwilog ar gau "o achos tân mewn safle gwersylla."

Mae lluniau ar gyfryngau cymdeithasol yn awgrymu bod y tân yn un sylweddol, a'i fod ar safle Garej Pandy ble mae busnes carafanau.

Dywedodd Gwasanaeth Tân ag Achub Gogledd Cymru bod 10 injan dân wedi eu galw i leoliad y tân, ar ôl derbyn galwad am y digwyddiad am 17.35.

Fe wnaeth swyddogion ofyn i drigolion lleol gau eu ffenestri a'u drysau am gyfnod.

Nid oes adrodiadau fod unrhyw un wedi eu hanafu.

Fe wnaeth yr heddlu ofyn i deithwyr i osgoi'r ardal tra bod y ffordd ar gau.

Cafodd y ffordd ei hail-agor yn ddiweddarach.

Image

Image

Lluniau: Lois Povey