Mae dyn wedi marw mewn gwrthdrawiad ffordd yn Sir Gâr nos Wener.

Dywedodd Heddlu Dyfed Powys fod car Isuzu llwyd yn rhan o'r gwrthdrawiad ar yr A48 tua'r dwyrain rhwng Cross Hands a Chwmgwili am tua 17:05. 

Bu farw dyn 55 oed yn y fan a'r lle, ac mae ei deulu yn cael eu cefnogi gan swyddogion arbenigol.

Fe gafodd y ffyrdd tua'r dwyrain a'r gorllewin eu cau tra bod y gwasanaethau brys yn bresennol.

Fe gafodd y ffordd tua'r gorllewin ac un lôn o'r ffordd tua'r dwyrain eu hail-agor am hanner nos, gyda'r ffordd tua'r dwyrain yn ail-agor yn llawn am 12:30 ddydd Sadwrn.

Mae'r heddlu yn annog unrhyw un â gwybodaeth i gysylltu â nhw gan ddefnyddio'r cyfeirnod 24*970191.