Mae menyw wedi cael ei chyhuddo mewn cysylltiad â marwolaeth pedwar o bobl yn dilyn digwyddiad padlfyrddio yn Sir Benfro.

Mae Nerys Bethan Lloyd, 39 oed, o Aberafan, wedi ei chyhuddo o bedwar achos o ddynladdiad esgeuluster difrifol ac un drosedd dan y Ddeddf Iechyd a Diogelwch yn y Gwaith.

Daw ar ôl digwyddiad ar Afon Cleddau yn Sir Benfro ar ddydd Sadwrn, 30 Hydref, 2021. 

Arweiniodd y digwyddiad at farwolaethau Paul O’Dwyer, Andrea Powell, Morgan Rogers a Nicola Wheatley ac roedd pedwar o oroeswyr eraill.

Bydd Lloyd yn ymddangos yn Llys Ynadon Hwlffordd ar 3 Rhagfyr 2024.

Dywedodd y Ditectif Uwcharolygydd Cameron Ritchie, yr uwch swyddog ymchwilio: “Yn dilyn ymchwiliad hir a chymhleth, yn gweithio’n agos gyda’r Awdurdod Gweithredol Iechyd a Diogelwch a Gwasanaeth Erlyn y Goron, mae Nerys Lloyd heddiw wedi ei chyhuddo o bedwar achos o ddynladdiad esgeuluster difrifol ac un achos dan y Ddeddf Iechyd a Diogelwch yn y Gwaith. 

"Mae teuluoedd y rhai hynny a fu farw a’r rhai hynny a oroesodd y digwyddiad i gyd wedi cael gwybod. Gan fod achosion troseddol nawr wedi cychwyn mae’n bwysig nad oes unrhyw riportio, sylwebaeth na phostio ar-lein a allai niweidio’r achos hwn.”

Llun: Morgan Rogers, Nicola Wheatley, Paul O’Dwyer ac Andrea Powell.