Mae teulu'r cyn chwaraewr rygbi Scott Hastings wedi dweud bod eu “calonnau ar chwâl” ar ôl i’w wraig ddiflannu ar ôl mynd i nofio.

Roedd Jenny Hastings wedi mynd i nofio ym Moryd Forth ddydd Mawrth ond heb ddychwelyd.

Dywedodd Gwylwyr y Glannau eu bod wedi derbyn adroddiad tua 2.45pm y diwrnod hwnnw a bod hofrennydd, timau achub gwylwyr y glannau, a badau achub wedi bod yn chwilio.

Daeth y chwilio i ben am 20.20 y noson honno.

Mewn datganiad, dywedodd teulu Hastings bod Jenny “wedi cael trafferth gyda’i hiechyd meddwl ers nifer o flynyddoedd”.

Dywedodd y teulu: “Gyda thristwch mawr rydym yn ysgrifennu atoch i’ch hysbysu bod Jenny wedi mynd i nofio ym Moryd Forth ar brynhawn dydd Mawrth Medi 3 2024, a bod yr heddlu’n trin y digwyddiad fel un lle mae person risg uchel ar goll.

“Mae calonnau’r teulu Hastings ar chwâl.

“Mae gan Jenny a Scott ddilyniant enfawr o ffrindiau o bob cefndir gan gynnwys y rhai sy’n gweithio yn y cyfryngau a gofynnwn i ni ar hyn o bryd gael caniatâd i alaru’n breifat gydag aelodau’r teulu.

“Rydyn ni’n gwybod eich bod chi i gyd eisiau gofalu amdanon ni’n ddwfn a chyn gynted ag y byddwn ni’n clywed unrhyw ddiweddariad gan yr heddlu byddwn ni’n rhoi gwybod i chi.

“Rydyn ni'n gweld eisiau ein Jenny. Mae’n gadael twll mawr yn ein calonnau i gyd ac yn gobeithio y caiff ei dychwelyd atom yn ddiogel fel y gallwn ddathlu ei bywyd rhyfeddol.”

Arwyddwyd y datganiad “Scott, Corey, Daniel, Kerry-Anne ac Ian”.

Fe chwaraeodd Scott Hastings, sy’n 59 oed, 65 o weithiau dros yr Alban rhwng 1986 a 1997 a dau o weithiau dros y Llewod.