Image
Achub ci oedd yn sownd o dan ddaear am saith awr
23/07/2024
Mae ci defaid wedi cael ei achub ar ôl saith awr yn sownd o dan ddaear.
Fe syrthiodd Bryn dros 22 metr i lawr twll cudd ar Foel Darren yng Nghwmdâr, Rhondda Cynon Taf.
Cafodd Tîm Achub Ogof De a Chanolbarth Cymru eu galw i gynorthwyo eu cydweithwyr yng Ngwasanaeth Tân ac Achub De Cymru i'w achub.
Roedd yr ymgyrch i achub Bryn wedi ei chynnal ddydd Sul ac yn cynnwys y defnydd o raffau a harneisiau.
Ar ôl saith awr, fe lwyddodd y timau achub i ddod ag ef yn ôl i'r wyneb yn ddiogel.
Image
Dywedodd Grant Pearce, sef perchennog Bryn, ei fod yn teimlo "cymaint o ryddhad".
"Mae Bryn yn saff, mae o allan [o'r twll] ac mae o'n iawn," meddai.
"Ni allwch goelio cymaint o ryddhad dw i'n ei deimlo."
Lluniau: Grant Pearce a Thîm Achub Ogof De a Chanolbarth Cymru
