Ar drothwy'r Sioe Frenhinol eleni mae coleg amaethyddol yng Ngwynedd wedi bod yn treialu tractor sy’n gallu ei yrru ei hun.

Rhoddwyd yr AgBot, tractor gwerth £380,000 sy'n defnyddio'r dechnoleg ddiweddaraf i yrru ei hun, ar brawf i dorri gwair ar gyfer silwair ar gae Tyn Rhos ar fferm Coleg Glynllifon.

Dywedodd Martin Jardine, Cyfarwyddwr Bwyd-Amaeth Grŵp Llandrillo Menai, mai’r gobaith yw y bydd y treialon “gwych” yn dangos sut y gall technolegau newydd fel yr AgBot fod o fudd i amaethyddiaeth ar laswelltir Cymru. 

“Rydw i'n edrych ymlaen at weld beth fydd casgliadau'r rhaglen ymchwil unigryw hon a gwybod sut roedd y cerbyd awtonomaidd yn cymharu â'r tractor traddodiadol oedd yn cael ei yrru,” meddai.

“Bydd yn ddiddorol gweld sut maen nhw'n cymharu o ran cyflymder, cywirdeb ac effeithlonrwydd.”

Mae’r ymchwil yn cael ei wneud ar y cyd ag AMRC Cymru, sydd wedi ei ariannu gan Lywodraeth Cymru a dan reolaeth Prifysgol Sheffield.

Image

‘Awyddus’

Y tractor traddodiadol sy'n cael ei ddefnyddio yn y treialon yw'r Fendt 516, sy'n defnyddio'r un injan disel â'r AgBot. 

Emyr Evans a'i Gwmni, cyflenwr peiriannau amaethyddol wedi’i leoli yn Ninbych a Gaerwen, sydd wedi darparu'r tractor Fendt ar gyfer y treialon.

Dywedodd Gwynedd Evans, cyfarwyddwr Emyr Evans a’i Gwmni, fod y cwmni'n gyffrous i fod yn rhan o dreialu'r dechnoleg ffermio ddiweddaraf.

“Daeth y coleg atom ni am fod y robot a'r tractor Fendt yn defnyddio'r un injan, felly'n naturiol roedd defnyddio un o'n tractorau ni yn dda ar gyfer cymharu," meddai.

“Mae’n rhywbeth cyffrous, newydd a chwbl wahanol, ac roedden ni'n awyddus iawn i fod yn rhan o'r prosiect. 

“Bydd yn ddiddorol gweld beth fydd canlyniad y treialon. Dw i'n gobeithio mai'r tractor fydd yn perfformio orau! Ond mae'n rhaid i ni groesawu technoleg newydd. 

“Mae'r tractor sydd gennym ni'n awr yn cynnwys llawer o dechnoleg – mae'n gywir iawn ac rydw i'n gobeithio y bydd hi'n agos iawn rhwng y ddau.”