Mae'r heddlu yn apelio am wybodaeth yn dilyn tân "heb esboniad" mewn hen ysgol yn Llandysul ddydd Mercher.

Dywedodd Gwasanaeth Tân Canolbarth a Gorllewin Cymru eu bod nhw wedi cael eu galw am 07:40 fore Mercher i ddigwyddiad ar Ffordd Penwalle.

Ymatebodd criwiau tân o Landysul, Castell Newydd Emlyn, Llanbedr Pont Steffan, Cei Newydd, Port Talbot, Aberystwyth a Chaerfyrddin i'r digwyddiad.

Image

Mewn datganiad ddydd Iau, dywedodd Heddlu Dyfed Powys bod y tân wedi achosi "difrod helaeth" i'r adeilad.

"Mae'r tân wedi'i ddiffodd ond mae'r difrod i'r adeilad yn helaeth ac nid yw'n ddiogel mynd i mewn iddo.

"Bydd swyddogion yn gweithio gydag ymchwilwyr Gwasanaeth Tân ac Achub Canolbarth a Gorllewin Cymru i ganfod achos y tân sy’n cael ei drin fel un heb esboniad ar hyn o bryd."

Mae’r llu yn gofyn i unrhyw un sydd gan wybodaeth i gysylltu â nhw gan ddefnyddio’r cyfeirnod 50 o'r 17fed.