Aelodau Seneddol newydd yn beirniadu gwasanaethau trên wrth geisio cyrraedd Llundain

08/07/2024

Mae aelodau seneddol Llafur newydd, rhai o Gymru yn eu plith, wedi beirniadu gwasanaethau trên yn hallt, wrth iddyn nhw wynebu oedi ar eu teithiau i Lundain.

Mae'r aelodau wedi tynnu sylw at wasanaethau annibynadwy, wrth iddyn nhw deithio o'u hetholaethau i Lundain er mwyn dechrau ar eu swyddi yn Nhŷ'r Cyffredin.

Roedd Claire Hughes, Aelod Seneddol Llafur newydd Bangor Aberconwy yn teithio ar wasanaeth Avanti West Coast. Ar ei chyfrif X, dywedodd:

"Mae'n newyddion nad yw'n syndod i unrhyw un, 'dw i'n siŵr, mae fy nhrên @AvantiWestCoast i lawr i Lundain ar gyfer fy niwrnod cyntaf yn San Steffan, wedi ei ganslo "

Inline Tweet: https://twitter.com/clairehughesBA/status/1810232327382970568

Atebodd Andrew Ranger, aelod Llafur newydd Wrecsam: "Dyna fy nhrên i hefyd!! Wel, mae gennym rywbeth arall i'w ychwanegu at y rhestr o bethau i'w taclo.#avantifail."

Inline Tweet: https://twitter.com/AndrewRangerMP/status/1810240125227401463

Roedd Paul Foster, Aelod Seneddol De Ribble hefyd yn flin ar ôl iddo gyrraedd gorsaf Preston a darganfod fod y trên am 6 fore Llun i orsaf Euston yn Llundain wedi ei ganslo.

Yn ystod yr ymgyrch etholiadol, dywedodd yr Ysgrifennydd Trafnidiaeth newydd Louise Haigh, y byddai Llafur yn ystyried tynnu cytundeb cwmni Avanti West Coast oddi arnyn nhw, pe bai'n ennill yr Etholiad Cyffredinol.

Dywedodd fod gwasanaeth y cwmni trenau yn "druenus."

Mae hi hefyd wedi addo y bydd holl wasanaethau trên y Deyrnas Unedig yn dod o dan berchnogaeth gyhoeddus.

Teithiodd Henry Tufnell, Aelod Seneddol Llafur newydd Canol a De Sir Benfro i Lundain ddydd Sul. Dywedodd ar ei gyfrif cymdeithasol: "Teithio i Lundain ac yn edrych ymlaen i ddechrau fy ngwaith fel AS Canol a De Sir Benfro.

Inline Tweet: https://twitter.com/TufnellHenry/status/1810007431520415953

"Yn anffodus, does dim trenau uniongyrchol o Sir Benfro, ac mae oedi ar y trên @GWRHelp trwy Gaerloyw. Llawer o waith i'w gyflawni..."

Mae cwmni Avanti West Coast wedi dweud yn flaenorol fod ganddyn nhw gynlluniau i ddarparu gwelliannau hir dymor i'w cwsmeriaid.

Newyddion diweddaraf

Newyddion