Mae ffigyrau chwyddiant wedi gostwng i 2% am y tro cyntaf ers bron tair blynedd.

Yn ôl y Swyddfa Ystadegau Gwladol mae'r gyfradd wedi gostwng i 2% ym mis Mai. 2.3% oedd y ffigwr ym mis Ebrill.

2% oedd targed Banc Lloegr.

Bydd y Banc yn gwneud penderfyniad ynglŷn â chyfraddau llog ddydd Iau gyda'r disgwyl na fyddan nhw yn cael eu torri'r mis yma.

Mae'r economi yn bwnc blaenllaw gan y pleidiau gwleidyddol i gyd cyn yr Etholiad Cyffredinol ar 4 Gorffennaf.