“Shwmae!”

Cafodd Taylor Swift ymateb byddarol yn ei chyngerdd yng Nghaerdydd nos Fawrth ar ôl agor y noson gydag ambell air o Gymraeg.

Gyda degau o filoedd o ‘Swifties’ yn Stadiwm Principality i wylio eu harwr, fe wnaethon nhw ymateb gyda bloedd pan wnaeth y seren Americanaidd eu cyfarch gyda “shwmae”.

Yna, ychydig yn ddiweddarach, wrth annerch y dorf unwaith eto, dywedodd: “It is such an honour and a pleasure to say these words tonight – ‘Cardiff, croeso i daith Eras’.”

Mae’r seren bop yng Nghymru am un noson, fel rhan o’i thaith Eras. Bydd hi yn perfformio mewn 15 o gyngherddau ar draws y DU fel rhan o’r daith.

Mae amcangyfrifon y gallai’r cyngerdd ddod a gwerth £64 miliwn o fudd economaidd i’r brifddinas, yn ôl Dr Robert Bowen, darlithydd busnes o Brifysgol Caerdydd.

Llun: PA