![Hollie Singer - Adwaith](https://ncms.s4c.org.uk/sites/default/files/styles/newyddion_large_square_1000x1000_/public/2024-05/Adwaith_OtherVoicesCardigan2023FRI%40JennieCaldwell40.jpg?itok=NZFBKVIM)
Arwyr y gitâr: Offerynnau amlycaf rocars Cymru
Mae'n anodd gor-bwysleisio pwysigrwydd y gitâr yng ngherddoriaeth gyfoes Cymru dros yr hanner canrif ddiwethaf.
Wedi i gitâr a gafodd ei defnyddio gan John Lennon dorri record mewn ocsiwn yn gynharach yr wythnos hon, dyma olwg ar rai o gitarau amlycaf y sin roc Gymraeg.
Hollie Singer - Adwaith
Adwaith yw un o fandiau mwyaf cyffrous Cymru gyfan, ac maen nhw wedi siarad am eu balchder am berfformio yn y Gymraeg i gynulleidfaoedd ar draws y Deyrnas Unedig ac Ewrop.
Yn ganolog i sŵn indie aml-ddimensiwn y band, mae gitâr Fender Jazzmaster y prif leisydd, Hollie Singer.
![Hollie Singer - Adwaith](https://ncms.s4c.org.uk/sites/default/files/styles/newyddion_large_square_1000x1000_/public/2024-05/Adwaith_OtherVoicesCardigan2023FRI%40JennieCaldwell40.jpg?itok=NZFBKVIM)
Gruff Rhys
Roedd Ffa Coffi Pawb a'r Super Furry Animals yn enwog am arbrofi gyda sŵn drwy wthio ffiniau eu gitarau trydan a chreu effeithiau anarferol gyda'u pedalau.
Ond fel artist unigol, mae Gruff yn fwy adnabyddus am ei ddefnydd o gitarau acwstig - gan gynnwys y gitâr glasurol hon, sydd â phatrwm unigryw i Gruff.
![Gruff Rhys](https://ncms.s4c.org.uk/sites/default/files/styles/newyddion_large_square_1000x1000_/public/2024-05/Gwyl_Lleisiau_Eraill_2020S4C_P1_Gruff_Rhys.png?itok=KbssMzsS)
Elidir Glyn - Bwncath
Bwncath yw un o fandiau mwyaf poblogaidd y sin roc Gymraeg, ac yn ganolog i'w sŵn roc anthemig mae gitâr acwstig Framus eu prif leisydd, Elidir Glyn.
![Elidir Glyn](https://ncms.s4c.org.uk/sites/default/files/styles/newyddion_large_square_1000x1000_/public/2024-05/Tafwyl_2023S4C_Bwncath_027.jpeg?itok=g0xpqO2g)
Peredur ap Gwynedd - Pendulum
Mae Peredur yn teithio'r byd gyda'i fand, Pendulum, sydd yn cyfuno roc a drum & bass.
Ac i greu'r cymysgedd aml-genre hynny, mae'n troi at ei gitarau trydan PRS.
![Peredur ap Gwynedd](https://ncms.s4c.org.uk/sites/default/files/styles/newyddion_large_square_1000x1000_/public/2024-05/Peredur%20ap%20Gwynedd%2002.jpg?itok=6C6vdBP8)
Tich Gwilym
Yn un o anfarwolion y sîn roc Gymraeg, Tich Gwilym yw ateb Cymru i Jimi Hendrix.
Ac yn was ffyddlon iddo am rhan hir o'i yrfa roedd ei yr gitâr Tokai Stratocaster, sydd wedi cael ei harddangos yn Amgueddfa Werin Cymru yn San Ffagan.
![Tich Gwilym](https://ncms.s4c.org.uk/sites/default/files/styles/newyddion_large_square_1000x1000_/public/2024-05/2048px-Tich_Gwilym_-_5199262909.jpg?itok=oTRzCdtr)
Dafydd Iwan
Mae Dafydd Iwan wedi bod yn lais i werin Cymru ers y 1960au, ac yn ystod y cyfnod hwnnw mae wedi ei weld yn perfformio gyda sawl gitâr acwstig.
Ond dros y blynyddoedd diwethaf, mae wedi bod yn dryw i'r gitâr acwstig Takamine.
![Dafydd Iwan](https://ncms.s4c.org.uk/sites/default/files/styles/newyddion_large_square_1000x1000_/public/2024-05/Dafyd%20Iwan.png?itok=5VlDSHPd)
Kizzy Crawford
Gyda dylanwadau jazz a soul ar ei cherddoriaeth, mae perthynas Kizzy Crawford â'i gitâr Martin yn guriad calon i bob un o'i chaneuon.
![Kizzy Crawford](https://ncms.s4c.org.uk/sites/default/files/styles/newyddion_large_square_1000x1000_/public/2024-05/Kizzy_0.jpg?itok=Gg7z7dc5)
Meic Stevens
Gyda'i arddull unigryw, mae Meic Stevens yn llysgennad i gerddoriaeth Gymraeg ac i'r gitâr acwstig.
Dyma lun ohono yn chwarae gitâr Martin o'r rhaglen S4C, Meic Stevens: Dim Ond Cysgodion, o 2019.
![Meic Stevens](https://ncms.s4c.org.uk/sites/default/files/styles/newyddion_large_square_1000x1000_/public/2024-05/Meic_Stevens_Dim_Ond_Cysgodion_2019S4C_012.jpg?itok=6a-Jh5YL)
Yws Gwynedd
Ers ei ddyddiau gyda Frizbee, mae Yws Gwynedd wedi cyffroi cynulleidfaoedd ledled y wlad gyda'i riffiau bachog, sydd yn aml yn cael ei chwarae ar ei Fender Telecaster blodeuog.