Mae Geraint Thomas wedi gorffen yn drydydd yn ras Giro d’Italia.

Fe orffennodd y Cymro 10 munud a 24 eiliad y tu ôl i’r enillydd, Tadej Pogačar o Slofenia.

Daniel Martínez o Colombia gorffennodd yn yr ail safle, gyda bwlch o 28 eiliad dros Thomas.

Roedd y ras dair wythnos yn cyrraedd ei therfyn yn Rhufain, gyda Tim Merlier o Wlad Belg yn cipio’r fuddugoliaeth yn y cymal olaf.

Roedd Thomas wedi mwy neu lai sicrhau ei le ar y podiwm yn dilyn cymal 20 ar ddydd Sadwrn, y diwrnod yr oedd hefyd yn dathlu ei ben-blwydd yn 38.

Daw hyn wedi iddo orffen yn yr ail safle yn y Giro d’Italia y llynedd.

Mae Thomas wedi awgrymu'r wythnos yma mai’r Giro eleni gallai fod y ras Grand Tour olaf iddo fod yn arweinydd ei dîm, Ineos Grenadiers.

Inline Tweet: https://twitter.com/INEOSGrenadiers/status/1794769811509293483

Mae Thomas wedi ei enwi yng ngharfan ei dîm ar gyfer y Tour de France, sydd yn cychwyn ddiwedd mis Mehefin, ond mae’n debyg mai rôl gynorthwyol y bydd ganddo yn y ras honno yn hytrach na chystadlu am fuddugoliaeth yn y dosbarthiad cyffredinol.

Mae hefyd wedi datgan ei ddymuniad i gystadlu yn y Gemau Olympaidd yn Paris ddiweddarach eleni.

Fe arwyddodd Thomas gytundeb am ddwy flynedd ychwanegol gyda thîm Ineos Grenadiers ar ddechrau’r tymor, fydd yn dod i ben ar ddiwedd tymor 2025.

Llun: X/@INEOSgrenadiers