Mae Aelodau Seneddol San Steffan wedi cefnogi cynlluniau i wahardd unrhyw un sydd wedi ei eni ar ôl 2009 rhag prynu sigarets. 

Mae hynny'n arwain y ffordd at greu cyfraith.

Llwyddodd y mesur nos Fawrth er gwaethaf gwrthwynebiad gan sawl Ceidwadwr blaenllaw, y cyn Brif Weinidog Liz Truss yn eu plith. 

Dywedodd Ysgrifennydd Iechyd Lloegr, Victoria Atkins wrth Aelodau Seneddol y byddai'r cynllun yn creu "cenhedlaeth ddi fwg"  

Cafodd y bil ei gymeradwyo o 383 pleidlais i 67.   

Ond mae Liz Truss yn dadlau y bydd yn "cyfyngu ar ryddid personol."

Doedd dim gorfodaeth ar aelodau Ceidwadol i bleidleisio dros y cynnig, a chefnogi safiad y llywodraeth.   

Pleidleisiodd yr Ysgrifennydd Busnes Kemi Badenoch yn erbyn y bil, tra roedd holl aelodau mainc flaen y Blaid Lafur o blaid y mesur .