Gallai gwleidyddion Gogledd Iwerddon ail ymgynnull yng Nghynulliad Stormont ddydd Gwener, wedi i Lywodraeth y Deyrnas Unedig gyhoeddi cytundeb arwyddocaol.
Mae disgwyl i ddeddfwriaeth gael ei chymeradwyo yn San Steffan ddydd Iau, a fyddai'n galluogi gwleidyddion Gogledd Iwerddon i ddychwelyd i Stormont wedi dwy flynedd.
O dan y cytundeb newydd, ni fydd archwiliadau arferol ar nwyddau sy'n croesi o Gymru Lloegr neu'r Alban ar draws y môr i Ogledd Iwerddon.
Anghytundeb am reolau masnach a gwirio nwyddau wedi Brexit, sydd wedi arwain at yr oedi cyn ail ymgynnull yn Stormont.
Daw'r datblygiad diweddaraf, ar ôl i blaid unoliaethol y DUP gyhoeddi eu bod wedi dod i gytundeb â Llywodraeth y Deyrnas Unedig yn ystod oriau mân fore Mawrth.
Roedd y DUP wedi cadw draw o Stormont am bron i ddwy flynedd mewn protest yn erbyn y trefniadau masnach wedi i'r Deyrnas Unedig adael yr Undeb Ewropeaidd.
Plaid weriniaethol Sinn Féin sicrhaodd y nifer mwyaf o bleidleisiau yn yr etholiad diwethaf yn 2022, ac mae hynny'n golygu mai Michelle O'Neill fydd yn cael ei henwebu yn Brif Weinidog Gogledd Iwerddon, a'r tro cyntaf i wleidydd gweriniaethol arwain y cynulliad yn Stormont.
'Gwaith enfawr'
Dywedodd Llywydd Sinn Féin Mary Lou McDonald y bydd honno yn "foment hynod o arwyddocaol."
Ond roedd hi'n cydnabod fod "gwaith enfawr" eto i'w gyflawni er mwyn adfer grym yn Stormont.
Mewn datganiad yn San Steffan brynhawn Mercher, dywedodd Ysgrifennydd Gogledd Iwerddon, Chris Heaton-Harris ei bod yn amser bellach i wleidyddion Gogledd Iwerddon "ddod at ei gilydd a chydweithio."
Ychwanegodd y bydd y cytundeb hwn yn troi'n gyfraith a bydd Llywodraeth y Deyrnas Unedig yn ei drafod ddydd Iau.
Rhan bwysig o'r broses, meddai, yw gweld Michelle O'Neill yn Brif Weinidog gan nodi ei fod yn "edrych ymlaen" i gydweithio gyda Sinn Féin.
Aelod o blaid unoliaethol y DUP fydd y Dirprwy Brif Weinidog.
Mae'r wefan hon yn defnyddio cwcis i sicrhau eich bod chi'n cael y profiad gorau ar ein gwefan.
