Ar ôl ymgymryd â'r rôl dros dro ers mis Chwefror 2023, mae Dyfed Edwards bellach wedi cael ei benodi yn Gadeirydd Bwrdd Iechyd Prifysgol Betsi Cadwaladr.

Bwrdd Iechyd Prifysgol Betsi Cadwaladr yn y gogledd sy'n cael y gefnogaeth fwyaf gan Lywodraeth Cymru yn sgil cyfres o fethiannau difrifol yn ymwneud â pherffomiad, diogelwch cleifion a phrinder staff, yn ogystal ag ymadawaid nifer o uwch swyddogion.  

Cafodd ei benodi’n ffurfiol i’r swydd gan y Gweinidog Iechyd, Eluned Morgan ddydd Mawrth. 

Yn dilyn ei benodiad, dywedodd Mr Edwards: "Mae’n anrhydedd cael y cyfle hwn a byddaf yn parhau i roi popeth i’r swydd ac i wasanaethu’r Bwrdd Iechyd a phobl Gogledd Cymru.

“Mae iechyd, a’r system iechyd a gofal yn cyffwrdd â phob un o’n bywydau ar adegau gwahanol ac mae’n rhan allweddol o’r ffabrig cymdeithasol sy’n cynnal ein cymunedau yng Ngogledd Cymru. 

"Rydym yn gwybod bod y Bwrdd Iechyd wedi bod yn tanberfformio ac yn methu o ran cyflwyno gwasanaethau cyhoeddus o’r radd flaenaf i’n cymunedau ond dros y flwyddyn ddiwethaf, rydw i wedi cyfarfod â llawer o staff anhygoel ac wedi gweld rhai gwasanaethau gwych. 

"Rydw i’n teimlo’n freintiedig o gael ymuno â’r tîm cryf o 19,000 o staff yn Betsi ac rydw i’n gwybod eu bod yn rhannu fy uchelgais i ac uchelgais y Bwrdd i wneud gwelliannau parhaus i iechyd a lles poblogaeth Gogledd Cymru ac o ran darparu eu gwasanaethau gofal iechyd.

“Rydym yn dechrau gweld cynnydd da ac rydw i’n edrych ymlaen at barhau â’r daith i greu sefydliad mwy effeithiol.”

Betsi Cadwaladr, yw bwrdd iechyd mwyaf Cymru, sydd â 19,000 o weithwyr yn gwasanaethu mwy na 700,000 o bobl ar draws Gwynedd,  Ynys Môn, Conwy, Sir Ddinbych, Sir y Fflint a Wrecsam.

Pedair blynedd yw tymor cadeirydd y bwrdd iechyd.