Mae ymchwiliad wedi’i lansio yn nhalaith Nevada yn yr Unol Daleithiau ar ôl i berson farw mewn gŵyl gerddoriaeth yn yr anialwch. 

Bu farw’r unigolyn yng ngŵyl Burning Man ar ôl i gyfnod o law trwm droi’r tir yn ansefydlog a pheryglus. 

Mae mynediad ffyrdd i’r ŵyl yn parhau ar gau, gan olygu nad oes modd i bobl adael y safle. 

Daw hyn ar ôl cyfnodau o dywydd eithafol sydd wedi achosi i gerbydau fynd yn sownd yn nhir mwdlyd yr anialwch Black Rock. 

Mae pobl wedi eu hannog i geisio am loches ac i arbed unrhyw fwyd sydd ar gael.

Mewn datganiad ddydd Sadwrn, dywedodd Swyddfa Siryf Sir Pershing ei fod yn “cynnal ymchwiliad am farwolaeth ddigwyddodd yn ystod y cyfnod eithafol o law.”

Mae teulu’r unigolyn wedi cael gwybod am ei farwolaeth. 

Mae awdurdodau lleol hefyd yn rhybuddio pobl i beidio â theithio i'r ardal. 

Due to recent rainfall, the Bureau of Land Management and the Pershing County Sheriff's Office officials have closed the entrance to Burning Man for the remainder of the event. Please avoid traveling to the area; you will be turned around. All event access is closed. pic.twitter.com/BY8Rv7eFLD

— Washoe Sheriff (@WashoeSheriff) September 2, 2023

Daeth y tywydd annisgwyl ar ddiwedd yr ŵyl, sy’n para naw diwrnod. Dyna'r cyfnod pan mae’r torfeydd ar eu mwyaf, wrth i bobl ymgynnull i weld dyn pren enfawr yn cael ei losgi. 

Mae disgwyl rhagor o gawodydd yn ystod y dyddiau nesaf, meddai’r awdurdodau lleol.

Mae rhybuddion y gallai gymryd sawl diwrnod i bobl allu adael yr ŵyl yn sgil hynny.