Rhian O'Sullivan yw'r fenyw gyntaf o Gymru i ennill cystadleuaeth dartiau'r PDC.

Enillodd y chwaraewr dartiau 42 oed o Lanelli Gyfres y Menywod ym Milton Keynes ddydd Sadwrn.

Dyma'r tro cyntaf i fenyw o Gymru gipio'r teitl, a bu'n rhaid iddi guro rhai o oreuon y gamp i sicrhau hynny.

Enillodd 5-0 yn erbyn Mikuru Suzuki yn y rownd agoriadol, cyn curo Carly Townsend, Aoife McCormack, Juliane Birchall ac Angela Kirkwood i sicrhau lle yn rownd yr wyth olaf.

Roedd O'Sullivan yn fuddugol eto yn y rownd honno gan guro Anca Zijlstra 5-0, cyn curo Trina Gulliver, sydd wedi ennill Pencampwriaeth Dartiau'r Byd i fenywod 10 o weithiau.

Beau Greaves oedd y gwrthwynebydd yn y rownd derfynol, sef yr ail chwaraewr dartiau menywod gorau yn y byd.

Er i'r Gymraes fod ar ei hôl hi o 3-2, fe wnaeth O'Sullivan frwydro'n ôl i drechu Greaves 5-3 a sicrhau'r teitl.

Mae O'Sullivan nawr yn y trydydd safle yn y gynghrair, gyda'r ddwy uchaf ar ddiwedd y tymor yn cymhwyso i chwarae ym Mhencampwriaeth y Byd i'r dynion.

Mae ei buddugoliaeth ddydd Sadwrn yn sicrhau ei lle ym mhencampwriaeth Betfred World Matchplay ym mis Gorffennaf.