Mae perchennog bwyty yng ngorllewin Cymru wedi penderfynu cau drysau'r busnes yn dilyn trafferthion recriwtio. 

Mae ffigyrau diweddar yn awgrymu bod 77% o fusnesau yng Nghymru wedi wynebu trafferthion wrth recriwtio yn ystod y flwyddyn diwethaf. 

Un o’r rheiny sydd wedi gweld yr effaith yw Steffan Hughes, perchennog Lolfa, bwyty yng Nghaerfyrddin. 

Dywedodd Steffan wrth ITV Cymru fod problemau iechyd, sawl aelod o staff yn gadael a thrafferthion recriwtio, wedi arwain at orfod cau’r bwyty.  

Fe wnaeth e ychwanegu bod yn rhaid iddo gau drysau’r bwyty gan nad oedd yn gallu dod o hyd i’r "gobaith i barhau”. 

“Yn anffodus, rydw i wedi gwneud y penderfyniad fod rhaid i ni gau ddiwedd y mis,” meddai.

“Mae’n codi ofn pa mor gyflym mae pethau fel hyn yn gallu digwydd. Ry’n ni jyst wedi gorffen ysgrifennu bwydlenni newydd i ddod mas ar gyfer y haf.

“Rydyn ni wedi cael trafferth recriwtio staff ers tua 6 mis nawr.” 

Image

Er bod ymchwil yn dangos bod problemau recriwtio yn parhau ar draws pob sector,  fe wnaeth arolwg gan British Chambers of Commerce (BCC) ddarganfod mai cwmnïau yn y sector lletygarwch sydd fwyaf tebygol o wynebu heriau wrth recriwtio.  

“Dwi wedi bod yn ôl yn rheoli fan hyn ers mis Ionawr, ers i’r rheolwr arall adael," meddai Steffan Hughes. "Do’n i ddim yn gallu teimlo bod neb yn gallu dod mewn i wneud y swydd.”

Fe wnaeth 61% o fusnesau yng Nghymru geisio recriwtio ym mhedwerydd chwarter 2022. O'r rheiny, roedd 77% o gwmnïau wedi wynebu anawsterau wrth ddod o hyd i staff addas. Roedd 61% o fusnesau yn ei chael hi'n anoddaf recriwtio gweithwyr digon medrus.  

“Dydw i dal ddim yn gallu credu’r peth," meddai Steffan Hughes. "Ry’n ni wedi cael dechrau mor dda i’r flwyddyn, ac mae’r ffactorau yma i gyd dros yr wythnos ddiwethaf yma wedi golygu bod yn rhaid inni gau."

'Her'

Dywedodd Cadeirydd Gweithredol Chambers Wales South East, South West and Mid, Paul Slevin: "Mae canfyddiadau Outlook Recriwtio Chwarterol y BCC yn dangos bod busnesau Prydain yn wynebu'r lefel uchaf o anawsterau recriwtio erioed. 

"Rydym wedi gweld yn gyson yng nghanlyniadau ein harolygon economaidd chwarterol ein hunain fod recriwtio, yn enwedig gweithwyr medrus, yn her barhaus i fusnesau yng Nghymru. 

“Dyw'r farchnad lafur hynod dynn ddim yn llacio ac yn parhau i roi pwysau ar fusnesau sy'n dymuno cynyddu cynhyrchiant a thyfu.

"Mae angen buddsoddi mewn hyfforddiant a datblygu sgiliau fel y gall cyflogwyr gefnogi pawb yn y gweithle, dod o hyd i weithwyr newydd ac ymateb i fylchau sgiliau a llafur yn eu busnesau.”