Newyddion S4C

Ana de Armas yn y ffilm Blonde

Gwobrau'r Razzies yn enwebu ffilmiau gwaethaf y flwyddyn

NS4C 23/01/2023

Mae gwobrau'r Golden Raspberry, neu'r Razzies, wedi cyhoeddi rhestr o enwebiadau ar gyfer yr actorion a'r ffilmiau gwaethaf ar gyfer 2022. 

Wrth i sêr Hollywood edrych ymlaen at dymor o seremonïau gwobrwyo, y Razzies yw'r unig restr enwebiadau y bydd actorion a chyfarwyddwyr yn geisio ei osgoi.

Wedi'i sefydlu yn 1981, mae'r Razzies yn cydnabod perfformiadau a ffilmiau gwaethaf y flwyddyn. 

Daw eu henwebiadau ddiwrnod cyn i'r Oscars, y gwobrau mwyaf ar gyfer y diwydiant ffilm, gyhoeddi eu rhestr ddydd Mawrth. 

Y ffilm Netflix Blonde sydd ar frig y rhestr eleni, gydag wyth o enwebiadau, gan gynnwys y ffilm waethaf, y sgript waethaf a'r cyfarwyddwr gwaethaf. 

Fe wnaeth y Razzies ddisgrifio’r ffilm, sydd yn dilyn hanes Marilyn Monroe, fel y "ffilm yr oedd gwylwyr cyffredin yn ei gasáu yn fwy na'r beirniaid." 

Y seren Tom Hanks - sydd wedi hen arfer derbyn gwobrau'r Oscars a'r Golden Globes - sydd wedi derbyn y nifer fwyaf o enwebiadau'r Razzies ar gyfer unrhyw actor eleni. 

Bu'r beirniaid yn feirniadaol iawn o berfformiadau Hanks yn ystod y flwyddyn, a hynny am ei ran yn ffilmiau Pinnochio ac Elvis. 

Y ffilmiau eraill sydd wedi ennill nifer fawr o enwebiadau yw Good Mourning gyda saith, Pinnochio gyda chwech a Morbius gyda phump enwebiad. 

This website uses cookies to ensure you get the best experience on our website.