Mae taith gyntaf gofodwyr NASA i'r Lleuad ers dros 50 mlynedd, fydd yn mynd â chriw yn ddyfnach i'r gofod nag ar unrhyw daith o'r blaen, wedi cychwyn.

Cafodd y roced sydd yn 322 troedfedd o hyd ac yn cludo pedwar aelod o'r criw ei lansio yn llwyddiannus o Cape Canaveral yn Florida, UDA, am 06.36 amser lleol.

Bydd y pedwar gofodwr yn cylchdroi'r Ddaear am tua 25 awr cyn anelu tuag at y Lleuad.

Ni fydd y criw yn glanio ar y Lleuad ei hun yn ystod y daith, a'r bwriad yw teithio heibio'r Lleuad sydd 244,000 o filltiroedd i ffwrdd - gan hedfan 5,000 o filltiroedd tu hwnt i hynny.

Bum munud i mewn i'r daith hanesyddol, dywedodd y Comander Reid Wiseman: "Mae'r Lleuad yn codi'n hardd, rydym yn mynd yn syth ati."

Roedd y tîm o ofodwyr wedi cyrraedd y capsiwl nifer o oriau cyn dechrau eu taith 10 diwrnod o hyd.

Ychydig iawn o le sydd yn y roced i'r criw gan fod y capsiwl o faint fan wersylla fach yn unig.

Cyn y daith, cafodd dros 700,000 galwyn o danwydd (2.6 miliwn litr) ei lwytho i'r llong ofod.

Y record ar gyfer y daith ofod bellaf yw tua 248,000 milltir, gafodd ei chwblhau gan griw o ofodwyr Apollo 13 yn 1970, oedd yn daith llawn problemau technegol.

Wrth i ofodwyr Artemis II basio tua 4,600 milltir y tu hwnt i ochr bellaf y Lleuad, bydd modiwl Orion yn colli cyswllt â'r Ddaear am tua 50 munud.

Er na fydd y gofodwyr yn glanio ar y lloeren, mae taith Artemis II yn paratoi'r ffordd ar gyfer glanio ar y Lleuad yn y dyfodol, ac mae hefyd yn gosod sylfaen i anfon criw i blaned Mawrth meddai NASA.

Inline Tweet: https://twitter.com/NASA/status/2039473910987534599