Roedd Storm Dave wedi dod â gwyntoedd cryfion i ogledd-orllewin Cymru dros nos, gyda hyrddiadau o hyd at 93mya wedi'u cofnodi yng Nghapel Curig yn Eryri.

Daw ar ôl i'r Swyddfa Dywydd gyhoeddi rhybudd oren am wynt dros benwythnos y Pasg.

Roedd y rhybudd mewn grym rhwng 19.00 nos Sadwrn ac 03.00 fore Sul - gan effeithio fwyaf ar siroedd Conwy, Gwynedd ac Ynys Môn.

Cafodd y rhybudd ei uwchraddio o felyn i oren amser cinio ddydd Sadwrn, gyda'r rhybudd yn golygu y gallai fod perygl i fywyd.  

Roedd disgwyl i'r storm ddod â hyrddiadau o 60 i 70mya, gyda 80mya mewn mannau mwy agored.

Oherwydd y gwynt "a allai fod yn niweidiol", roedd y Swyddfa Dywydd wedi annog pobl i osgoi mynd allan lle bo modd.

"Mae bod y tu allan mewn gwyntoedd cryfion yn eich gwneud chi'n fwy agored i anaf," meddai llefarydd ar ran y swyddfa.

"Arhoswch dan do cymaint â phosibl. Os ewch chi allan, ceisiwch beidio â cherdded, na chysgodi, yn agos at adeiladau a choed. 

"Cyn gwyntoedd cryfion, gwiriwch am eitemau rhydd y tu allan i'ch cartref a'u sicrhau - biniau, dodrefn gardd, trampolinau, pebyll, siediau, a ffensys."

Roedd y Swyddfa Dywydd hefyd wedi rhybuddio bod oedi’n debygol ar y ffyrdd a’r rheilffyrdd, yn ogystal ag i wasanaethau awyr a fferi, gyda chanslo rhai gwasanaethau yn bosib.

Roedd y rhagolygon yn rhybuddio bod difrod i adeiladau'n debygol, gan gynnwys teils yn cael eu chwythu oddi ar doeau.

Roedd y Swyddfa Dywydd hefyd wedi cyhoeddi rhybudd melyn am wynt rhwng 17.00 ddydd Sadwrn a 07.00 fore Sul, gyda hynny'n effeithio ar y siroedd canlynol: Ceredigion; Conwy; Sir Ddinbych; Sir y Fflint; Gwynedd; Ynys Môn; Sir Benfro; Powys.

Image

Er hynny, mynnu mentro oedd rhai yn Eryri gyda pherchnogion busnes yn gobeithio am Basg prysur. 

Dywedodd Nathan Price, gweithiwr siop yn Llanberis, bod y tywydd yn gallu bod o fantais i rai busnesau.

"Er bod y tywydd wedi bod reit ddrwg, mae'n gallu ffafrio ni un ffordd hefyd - mwy o bobl yn dod i brynu cotiau glaw a trowsus glaw," meddai.

"I Llanber mae twristiaid yn dod i'r pentre yn dod â lot o fusnes i ni a lot o cwmnïau eraill yn y pentre, so definitely yn positif."