Mae o leiaf pump o bobl wedi marw ar ôl i awyren cargo Amazon wrthdaro â cherbydau eraill yn yr Unol Daleithiau brynhawn Sul.

Fe darodd yr awyren nifer o gerbydau a mynd ar dân wrth geisio glanio ym Maes Awyr Rhyngwladol Miami yn nhalaith Florida.

Cafodd pump o bobl eraill eu hanafu yn y ddamwain, meddai pennaeth Gwasanaeth Tân ac Achub Miami-Dade, Raied 'Ray' Jadallah.

Mae tri mewn cyflwr difrifol ac wedi cael eu cludo i ganolfan drawma, tra bod dau arall wedi cael eu cludo i ysbyty lleol, meddai mewn cynhadledd newyddion nos Sul.

Roedd nifer o’r dioddefwyr yn gaeth yn y cerbydau a gafodd eu taro gan yr awyren ac roedd rhaid i’r gwasanaethau brys eu rhyddhau, meddai Jadallah.

Roedd yr awyren cargo Boeing 767-300 wedi hedfan o San Juan, Puerto Rico, cyn mynd y tu hwnt i ddiwedd y rhedfa ar ôl glanio ym Miami tua 14:00, yn ôl Gweinyddiaeth Hedfan Ffederal yr Unol Daleithiau (FAA).

Nid yw’n glir pam nad oedd yr awyren yn gallu stopio mewn pryd.

Mae adolygiad CNN o recordiadau rheolwyr traffig awyr yn dangos na wnaeth y peilotiaid ddatgan argyfwng cyn glanio.

Dywedodd Gwasanaeth Tân ac Achub Miami-Dade ar X fod dros 60 o griwiau wedi cyrraedd ac wedi gweld “awyren oedd wedi mynd ar dân oherwydd y ddamwain hon, gyda fflamau mawr a mwg i’w gweld.”

Llun: Rohan Ellis drwy Reuters